SHAABAA Playoffs: Batch 2013, 2014 milugwa nga Top 2 seeds sa Division C
CEBU, Philippines — Ang defending champion Nest Workspaces Batch 2013 ug Cebu Landmasters/CouldKart Batch 2014 miangkon sa nag-unang duha ka luna sa Division C playoffs sa Sacred Heart Ateneo Alumni Basketball Athletic Association (SHAABAA) Season 27 niadtong Domingo, Hunyo 30, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Si Fletcher Galvez mipabuto og 22 puntos, 10 ka rebounds, upat ka blocks, duha ka steals, ug usa ka assist, si Rendell Senining midugang og 21 puntos, pito ka rebounds, pito ka assists ug duha ka steals, samtang si Arc Araw-araw mihipos og 16 puntos, walo ka rebounds ug unom ka assits sa dihang gilampaso sa Batch 2013 ang Global Star Motors Batch 2020, 77-58.
Sa laing bahin, sila si Jair Igna ug Popoy Navarro nagkumboya'g 33 puntos, 13 ka rebounds, pito ka assists ug tulo ka steals sa dihang gidemolis sa Batch 2014 ang Bright Lamps N’ Style Batch 2022, 89-49.
Ang Batch 2013 ug Batch 2014 mihuman sa eliminasyon bitbit ang managsamang 6-1 win-loss rekords apan ang Batch 2013 milugwa nga top seed padung ngadto sa Final Four kortesiya sa simple tie.
Ang Forex Xchange Batch 2018 ug FADI Batch 2021 maoy nagkumpleto sa four-team semis sa Division C.
Si Jed Colonia mipupo og 19 puntos, lima ka rebounds, ug unom ka steals, si Benedict Andre Chua mikolekta na sab og double-double uban ang 15 puntos ug 11 ka rebounds, samtang si Xavier Tariman ug Christian Manaytay parehong mitali og 12 puntos aron ituboy ang Batch 2018 ngadto sa 72-58 nga pagpakaging sa CSAS Batch 2024. Si Rey Marcus Fuentes miharos og 24 puntos, upat ka rebounds ug upat ka assits, si Virgil Maynard Uy miamot og 15 puntos ug upat ka rebounds samtang sila si Joshua Uribe ug Walter Franz Yu mikadlit og 13 puntos matag usa sa dihang gipayaka sa Batch 2021 ang GAB Airconditioning Batch 2023, 81-74.
Sa knockout semis nga gikatakda karong Hulyo 21, ang Batch 2013 mosakbang sa Batch 2021, samtang ang Batch 2014 makigharong sa Batch 2018.
- Latest
