Ubas, Cruz nagbigay ng karangalan sa Pinas
MANILA, Philippines — Nagbigay ng karangalan sa Pilipinas sina long jumper Janry Ubas at table tennis player sensation Kheith Rhynne Cruz matapos magwagi sa kani-kanilang mga torneo.
Nilundag ni Ubas ang gold medal sa men’s long jump matapos magposte ng bagong season-best 7.85 meters sa 2024 Silk Road to Olympics sa Tashkent, Uzbekistan.
Sinapawan ni Ubas, bigong makakuha ng tiket sa 2024 Paris Olympic Games, sina Ming Tai Chan (7.75m) ng Hong Kong at Timur Isakov (7.42m) ng Kyrgyzstan.
Minalas ang 30-anyos na tubong Misamis Oriental na makuha ang Paris qualifying mark na 8.27m matapos pumuwesto sa ika-44 sa kukuning Top 32 sa World Athletics rankings.
Umaasa sina hurdlers Lauren Hoffman at John Cabang Tolentino at sprinter Kristina Knott na makakasama kay pole vaulter EJ Obiena sa Paris Games.
Samantala, hinataw ni Cruz ang titulo sa U19 girls’ singles ng World Table Tennis Youth Contender Westchester 2024 sa Pleasantville, New York.
Tinalo ng 17-anyos na estudyante ng Paco Citizen Academy Foundation sa finals si Lichen Chen ng United States, 11-5, 11-13, 11-8, 12-10.
Ito ang ikalawang WTT (World Table Tennis) youth contender crown ni Cruz matapos pagreynahan ang Puerto Princesa finals noong Oktubre.
Pumangalawa naman si Cruz sa U19 mixed doubles katambal si Bosman Botha matapos yumukod kina Naresh Nandan at Rachel Wang, 11-6, 8-11, 11-8, 8-11, 11-9.
Si Obiena pa lamang ang pambato ng bansa sa athletics sa Paris Olympics na nakatakda sa Hulyo 26 hanggang Agosto 11.
- Latest
