Pacquiao may bagong kalaban
MANILA, Philippines — May ibang makakalaban si eight-division world champion Manny Pacquiao sa three-round exhibition match nito na idaraos sa Hulyo sa Saitama, Japan.
Nakatakda sanang makaharap ni Pacquiao si mixed martial artist Chihiro Suzuki ng Japan sa Hulyo 28 sa Saitama Super Arena sa Saitama.
Subalit napilitan itong mag-withdraw matapos magtamo ng injury habang nagsasanay ito.
Magiging kapalit ni Suzuki si Japanese mixed martial artist Rukiya Anpo.
Pareho ang magiging patakaran sa laban.
Tatlong rounds lamang ito na may tig-tatlong minuto kada round.
Ito ang unang laban ni Pacquiao matapos ang exhibition match nito kontra sa isang South Korean YouTuber noong Disyembre ng taong 2022.
Nagpasya si Pacquiao na magretiro na noong 2021 para pagtuunan ng pansin ang kanyang kandidatura sa presidential elections noong 2022.
Natalo si Pacquiao sa naturang National Elections.
Target ni Pacquiao na bumalik sa professional boxing kung saan puntirya nitong makaharap si Mario Barrios sa isang World Boxing Council (WBC) welterweight world title fight sa huling bahagi ng taon.
Wala pang opisyal na anunsiyo ang kampo ng Pinoy champion kung kasado na ang magiging laban nito kay Barrios.
Sesentro muna ang atensiyon ni Pacquiao sa exhibition match.
- Latest
