Core Pacific Group mikadlit sa ikatulong sagunson nga daog

CEBU, Philippines — Ang Core Pacific Group miinat sa mainit nilang ratsada ngadto sa tulo ka duwa human gilampornas ang  Magis Medical Fund, 82-66, sa Sacred Heart Ateneo Alumni Basketball Athletic Association (SHAABAA) Season 27 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue. Si Jeremy Ryan Huang mikolekta og 22 puntos, upat ka rebounds, ug tulo ka assists, samtang si SHAABAA chairman Afshin Ghassemi milansang og duha ka 3-pointers sa iyang 11 puntos sa dihang gipahugtan sa Core Pacific ang ilang pagkupot sa solong liderato sa Division A bitbit ang perpektong 3-0 rekord.

Sila si Nico Oyas, Jerick Doncillo, ug Arturo Mejares nagkumbinar og 36 puntos apan nakawang ang ilang paningkamot gumikan kay ang Magis Medical Fund nasugamak sa ikatulong sunod-sunod nga higayon.

Sa laing aksiyon sa Division A, si Derick Mangubat mihipos og 16 puntos, siyam ka rebounds, upat ka assists, ug upat ka steals, samtang sila si Jacob Soberano ug Paulsen Uy nagkumboya'g 23 puntos sa dihang ang GMall of Cebu milampaso sa 2kcares.org, 84-32, alang sa ikaduha nilang daog sa tulo ka duwa.

Sa Division C, si Rendell Senining miharos og 30 puntos, siyam ka rebounds, tulo ka assists ug duha ka steals aron ituboy ang defending champion Nest Workspaces Batch 2013 ngadto sa 89-72 nga pagbugha saBright Lamps N' Style Batch 2022. Si Arc Araw-Araw midugang og 23 puntos ug siyam ka assists, samtang si Emman Malazarte dunay 16 puntos ug 10 ka rebounds alang sa Batch 2013, nga miinat sa ilang barabha ngadto sa 5-1.

Sa ubang mga resulta, si Popoy Navarro miposte og 20 puntos ug 11 ka rebounds sa dihang gipayaka sa Cebu Landmasters/CloudKart Batch 2014 ang CSAS Batch 2024, 65-57, si Benedict Andre Chua mipupo og double-double nga 28 puntos ug 14 ka rebounds aron pangulohan ang Xchange Forex Batch 2018 ngadto sa 81-56 nga demolisyon sa FADI Batch 2021, samtang si Mitch Almodal mitali og 20 puntos sa dihang ang Global Star Motors Batch 2020 mibungkag sa GAB Airconditioning Batch 2023, 81-60.