Amparo mosuway pagpakgang sa sagunson niyang pilde

CEBU, Philippines — Si Jake  El Bambino  Amparo (14-6-1, 3KOs) sa PMI Bohol Stable mosuway pagdimdim og balik sa katam-is sa kadaogan sa dihang iyang harongon ang kababayan niyang si JC "Kidlat" Francisco (8-16-6, 3KOs) sa Valenzuela City sa main event sa  Kumong Bol-Anon 16  karong adlawa (Lunes, Hunyo 24) didto sa Bilar, Bohol.

Ang  26-anyos nga si Amparo mihaw-as gikan sa duha ka sagunson nga pilde.

Una, si Amparo miyukbo ngadto ni Pedro Taduran pinaagi sa unanimous decision sa ilang International Boxing Federation (IBF) minimumweight eliminator niadtong Disiembre 28 sa miaging tuig didto sa dakbayan sa Tagbilaran.

Tulo ka bulan ang milabay, si Amparo naka-angkon og talagsaong oportunidad nga maka-away alang sa world title isip hulip ni ArAr Andales.

Apan ang garbo sa Guindulman gibuntog ni IBF 105-pound champion Ginjiri Shigeoka pinaagi sa unanimous niadtong Marso 31 didto sa International Conference Hall sa Nagoya, Japan.

Si Amparo nanghinaut nga pakgangon ang sagunson niyang pagkaparot sa dihang makigpinaksitay siya ni Francisco sa usa ka non-title bout sud sa walo ka hugna.

Lain pang mag-engkwentro sa kulbahinam nga pasundayag mao sila si Sugarey Leonard Pores vs Jerson Arigola, Richard Laspona vs Carlo Diaz VII, Leonard Pores III vs Rustom Sario, ug Rey Simbajon vs. Marjhun Tabamo.