Durham ibabalik ng Bolts sa Governors’ Cup

MANILA, Philippines — Kagaya ng ibang nagkakampeon, ang back-to-back crown ang target ng Meralco para sa darating na PBA Governors’ Cup sa Agosto.

At planong ibalik ng Bolts si three-time PBA Best Import Allen Durham para sa hangad nilang ikalawang sunod na titulo matapos pagharian ang nakaraang Season 48 PBA Philippine Cup.

“I’ve spoken with coach Nenad (Vucinic) and we would love to have AD join us. We have to come to terms with his agent,” ani Meralco coach Luigi Trillo kay Durham.

Iginiya ng 6-foot-6 na si Durham ang Bolts sa runner-up finishes sa PBA Governors’ Cup noong 2016, 2018 at 2019 na lahat ay kontra sa Ginebra Gin Kings.

Kumpiyansa si Trillo na malaki ang maitutulong ng 35-anyos na undrafted player noong 2011 NBA Rookie Draft sa kanilang hangad na back-to-back crown.

“We have to really lock in and have a good two weeks of preseason training before we get on the court again,” wika ng two-time PBA champion coach.

Nakamit ng Meralco ang kanilang kauna-unahang PBA championship matapos ang 14 taon mula sa 4-2 pagdispatsa sa San Miguel sa 2024 PBA Philippine Cup.

Huling sumalang si Durham sa B.League para sa  Ryukyu Golden Kings.

Sakaling hindi nila maibalik si Durham ay maghahanap ang Meralco ng ibang import sa NBA Summer League sa Las Vegas, Nevada.

Sa darating na PBA Governors’ Cup ay magpaparada ang 12 teams ng mga imports na may sukat na 6’6 pababa.