Fajardo BPC ng Philippine Cup

MANILA, Philippines — Hinirang si June Mar Fajardo ng San Miguel bilang Best Player of the Conference ng Season 48 PBA Philippine Cup bago ang Game Four ng championship series kahapon sa Smart Araneta Coliseum.

Ito ang pang-walong BPC trophy ng seven-time PBA Most Valuable Player sa Philippine Cup at ika-10 sa kabuuan.

Humakot ang 6-foot-10 na si Fajardo ng kabuuang 1,100 points mula sa 472 statistical points, 514 votes ng media at 114 votes ng mga players.

Inungusan ng 34-anyos na Cebuano giant para sa BPC award ang kanyang SMB teammate na si CJ Perez at sina NLEX scoring machine Robert Bolick, Terrafirma rookie Stephen Holt at Christian Standhardinger ng Barangay Ginebra.

Nauna nang naglista si Fajardo ng 43.12 statistical points para lampasan si Bolick (43.08 statistical points) sa No. 1 spot sa BPC race.

Nagmula ito sa kanyang mga averages na 17.3 points, 14.5 rebounds at 3.1 assists para akayin ang Beermen sa 4-0 sweep sa Rain or Shine Elasto Painters sa best-of-seven semifinals showdown.

Tumipa naman si Holt ng 40.8 statistical points mula sa mga averages na 21.08 points, 8.1 rebounds, 6.3 assists at 2.4 steals sa pag-entra ng Dyip sa una nilang playoffs appearance sapul nang sumabak sa PBA noong 2016.

Ang 2023 PBA Draft top pick ng Terrafirma ang leading candidate para sa Rookie of the Year trophy.

Samantala, pinatawan ng PBA Commissioner’s Office sina Meralco coach Luigi Trillo at active consultant Nenad Vucinic ng tig-P20,000 multa.

Ito ay matapos nilang komprontahin ang mga game officials dahil sa 94-95 kabiguan ng Bolts sa Beermen sa Game Two.