Beermen miresbak sa Bolts
CEBU, Philippines — Ang San Miguel Beermen nagsandig sa pagkamabayanihon nilang CJ Perez ug Marcio Lassiter aron pag-eskapo ngadto sa kulbahinam ug makutas nga daog, 95-94, batok sa Meralco Bolts ug tablahon ang ilang best-of-seven PBA Philippine Cup finals sa baraha nga 1-1 niadtong Biyernes sa gabii didto s aSmart Araneta Coliseum.
Si Perez mipabuto og 34 puntos, pito niini iyang gibubo sa katapusang kuwarter apil na ang krusyal niyang 3-pointer nga nakapasikit sa Beermen ngadto sa usa na lang ka lugas human siya mabiyaan og otso puntos.
Samtang si Lassiter mihipos lamang og sayes puntos apan maoy mipasud sa labing hait nga itsa nga nakapawong sa kuryente sa Bolts.
Si Lassiter milansang sa gitira niya tres sa pinal nga 13.2 segundos nga nahimong yawi sa Beermen sa makapaisa'g balahibo nilang kadaogan.
Wala sab magpabitin ang Sugbuanong higante nga si June Mar Fajardo nga mitampo og 17 puntos ug 13 ka rebounds ingon man sila si Don Trollano ug Mo Tautuaa nga nagkumbinar og 22 puntos alang sa labing unang daog sa Beermen batok sa Bolts ning komperensiya.
Sa wala pa ang Game 2, ang Beermen miyukbo sa Bolts, 86-93, sa finals opener ug sa iskor nga 92-95 sa eliminasyon.
Buk-on sa Beermen ug Bolts ang ilang panagtabla sa Game 3 karong adlawa didto gihapon sa Big Dome.
- Latest
