Mga atleta sa CEC nangharos

Mikulit og bag-ong rekord sa FCAAF Meet 2024

CEBU, Philippines — Ang pambato nga mga atleta sa Cebu Eastern College (CEC) milamas sa malampuson nilang kampanya pinaagi sa pagkulit or rekord sa Filipino Chinese Amateur Athletic Federation (FCAAF) National Invitational Track and Field Championships 2024 didto sa PhilSports Track Oval sa Pasig City ning bag-ohay pa lamang.

Sa kinatibuk-an, ang Easternians mihakot og 62 ka medalya nga gibahin-bahin ngadto sa 21 ka gold, 30 ka silver, ug 11 ka bronze.

Si Jayeon Zarl Barriga maoy nangu sa mainit nga ratsada sa CEC uban ang lima ka bulawang medalya ug usa ka silver hinungdan nga siya maoy gibayaw nga Most Outstanding Athlete (MOA) sa Male C category.

Si Barriga, nga basketball varsity player sab sa CEC Dragons nga nakampiyon sa elementary division (12 Under) sa Cebu Schools Athletic Foundation, Inc. (CESAFI) Season 23 sa maging tuig, mitimon sa CEC ngadto sa bag-ong rekord sa FCAAF sa 100-meter mixed relay kauban silang Sophia Nicole Abas, Richena Faith Vargas, ug Steven Oswald Bere.

Ilang gihuman ang lumba sud lamang sa 57 segundos aron papason ang karaang marka nga usa ka minuto ug 3.5 segundos.

Sa Male D, sila si James Washington Ong ug Jhon Cristian Paraguso parehong mibulsa og tulo ka golds sa 4X50m, 4x100m, ug 4x100m mixed relay, samtang sila si Crestian Daniel Paraguso ug Ron Anthony Grancho misakmit og tagurha ka bulawan sa 4x50m ug 4x100m relay.

Wala sab magpa-alkansi ang managsoon nga sila si Joeie Eireen ug Julienne Eve Yap nga milabi og golds sa 4x100m mixed relay sa Female D, samtang si Claire Dabon maoy nanghawod sa 60m run. 

Ang uban nga mitampo og medalya alang sa CEC mao sila si John Frederick Ong, Ramon Oropesa III, Justine Sanico, Xizhi Prescillas, Julianne Marie Claro, Nikah Odron, ug Ziyi Precillas.

Ang CEC mikab-ot ning mahinungdanong dungog luyo sa maanindot nilang programa sa athletics ubos sa paggiya ni coach Maria Dolores "Sagay" Sagarino-Opoc, nga usa ka premyadong atleta atol sa iyang panahon.

Tinun-an ni coach Danny Villadolid sa mabulokon niyang mga tuig isip estudyanteng atleta sa Cebu Central Colleges (nga University of Cebu na karon), si Sagarino-Opoc gold medalist sa kanunay sa high jump, long jump, ug 100m hurdles events sa Cebu Amateur Athletic Association (nga mao na karon ang CESAFI) ug sa Central Visayas Regional Athletic Association (CVIRAA) Meet niadtong 1980s.

Si Sagarino-Opoc silver medalist sab sa high jump ug heptathlon sa National Open Track and Field Championships niadtong 1982 ug 1984.

Ang mga bangiitan niyang kadungan niadtong tungora mao ang mga legends sa Philippine sports nga sila si Lydia de Vega-Mercado, Elma Muros-Posadas, ug Corazon Magante.