Tabogon mo-host sa ikaduhang leg sa MS Motosuit Motocross Series

CEBU, Philippines — Lab-as pa gikan sa malampuson nilang Silver anniversary race, ang Sugbuanong sportsman nga si Lou Ornopia nangandam karon alang sa ikaduhang leg ilang 2024 MS Motosuit Motocross Series nga gikatakda sunod semana.

Giulohan og 2nd Mayor Francis Salimbangon Motocross Cup, ang kulbahinam nga karera ipahigayon karong Mayo 18 didto sa Barangay Pio sa lungsod sa Tabogon amihanang bahin sa Sugbo aron pagdugang og lamas sa selebrasyon sa tinuig nilang pista agig pagtamod sa minahal nilang patron nga si San Isidro Labrador.

"Nalipay og maayo ang atoang mga riders kay nabuhi na og balik ang motocross dinhi sa Sugbo," matud pa ni Ornopia, nga gipasidunggan kanhi nga "Sportsman of the Year" sa Sportswriters Association of Cebu (SAC) tungod sa dili hitupngan niyang dedikasyon pagpalambo sa motocross dinhi sa probinsiya.

"Gipangkamotan nato nga mabalik ang atong mga lumba dili lamang aron ma-hone ang atong local talents apan aron sab ma-competitive sila og balik kay akong nakita nga nalupig na gyud ta sa ato neighboring riders," padayon pa ni Ornopia.

Sama sa pasiuna nilang leg nga nadungan sa ika-25 nga edisyon sa Ornopia Cup didto sa Calambua, San Remigio sa miaging bulan, si Ornopia nagkanayon nga moapud-apud gihapon siya og ganting salapi sa tanang mga mananaog gikan sa beginners ngadto sa expert ug pro open category.

"Pasalamat ko og dako sa Tabogon LGU ubos sa pagpangu ni mayor Francis Salimbangon sa paghatag niya og suporta ning atong race series," dason pa ni Ornopia. "Hinaut nga pinaagi niining atong kalihukan madasig ang atong mga riders nga bairon og balik ang ilang abilidad."

Uban ang igsoon niyang si Siegfred isip race director, si Ornopia mibutyag nga lagmit ang ikatulo nilang leg mahitabo karong Hunyo.  Gikan niini, mopasiugda sila og mga duha pa ka lumba sa dili pa matapos ang tuig.-