Jokic mibira sa ikatulong MVP award
CEBU, Philippines — Ang All-Star center sa Denver Nuggets nga si Nikola Jokic maoy gibayaw nga season MVP sa NBA sa ikatulong higayon kagahapong adlawa.
"We've got to start with the teammates. Without them I cannot do anything," matud pa ni Jokic. "Coaches, players, organization, medical staff, across time coaches, development coaches -- it's all one big circle that I cannot be wherever I am without them."
Ang 29-anyos nga Serbian, nga midaog sa prestihiyosong award niadtong 2021 ug 2022, padayon pa hinoon nga nangindahay sa labing una niyang NBA title taliwala sa daghang mga kadungganan nga iyang nahakot.
Ning season, si Jokic mi-average of 26.4 puntos, 12.4 rebounds ug 9.0 assists aron pildihon sila si Shai Gilgeous-Alexander sa Oklahoma City Thunder ug Luka Doncic sa Dallas Mavericks alang sa maong pasidungog.
Si Jokic nakigduyog na karon nilang Moses Malone, Larry Bird ug Magic Johnson isip mga NBA players nga naka-alsa og tulo ka tropeyo isip MVP.
Si Kareem Abdul-Jabbar nag-una gihapon sa listahan uban ang unom ka MVP awards. Nagsunod kaniya sila si Bill Russell ug Michael Jordan nga dunay taglima ka MVP ug dayon sila si Wilt Chamberlain ug LeBron James nga dunay upat matag usa.
Si Nuggets coach Mike Malone mapasigarbuhon sa nakab-ot sa labing lig-on nga haligi sa ilang koponan.
"I don't know if I can put that into words what his greatness means to every team," dason pa ni Malone. Duna pa hinooy mabug-at nga misyon nga sagubangon si Jokic gumikan kay ang Nuggets alkansi sa baraha nga 2-0 batok sa Minnesota Timberwolves sa ilang best-of-seven NBA Western Conference semifinal series.
- Latest
