Timberwolves 2-0 na; Mavs,Pacers nakatabla

CEBU, Philippines — Si Jaden McDaniels mikadlit og 25 puntos sa dihang gidominar sa Minnesota Timberwolves ang Phoenix Suns, 105-93, aron pagposte og 2-0 nga bentaha sa ilang best-of-seven series sa unang hugna sa NBA Western Conference playoffs kagahapong adlawa didto sa Target Center sa Minneapolis, Minnesota.

Gawas sa nindot niyang opensa, si McDaniels milangkat sab og walo ka rebounds ug mipasa og tulo ka assists aron pangulohan ang balanseng ataki sa Wolves diin ang tanan nilang starters mirehistro og double digits.

Sila si Rudy Gobert ug Mike Conley mihipos og 18 puntos matag usa, si Anthony Edwards midugang og 15 puntos, walo ka assists ug tulo ka rebounds, samtang si Karl-Anthony Towns miamot og 12 puntos alang sa nagmangtas nga Wolves.

"We got a lot of guys who can put the ball in the basket," matud pa ni Minnesota coach Chris Finch. "We're really making the right plays right now." Didto sa Los Angeles, si Luka Doncic mipupo og 32 puntos uban ang siyam ka assists ug unom ka rebounds sa dihang gibaslan sa Dallas Mavericks ang Clippers, 96-93, aron tablahon ang ilang serye sa baraha nga 1-1.

Si Kyrie Irving midonar og 23 puntos, unom ka rebounds, tulo ka assists ug tulo ka steals alang sa Mavs nga nadasig og samot kay ang serye molabyog man didto sa ilang korte alang sa Game 3. Sila si James Harden ug Paul George parehong mitali og 22 puntos sa pilderong Clippers.

Didto sa East, ang Indiana Pacers nakabawos sab sa Milwaukee Bucks, 125-108, aron tablahon ang ilang serye, 1-1.

Si Pascal Siakam mibubo og 37 puntos, 11 ka rebounds ug unom ka assists alang sa Pacers. Nakakuha siya og dakong suporta gikan nilang Myles Turner ug Andrew Nembhard nga nagkumbinar og 42 puntos.

Kay wala gihapon ang injured nilang alas nga si Giannis Antetokounmpo, mibirada na sab si Damian Lillard apan ang iyang 34 puntos dili igo ning higayona alang sa Bucks.