Gealon Racing Team mipupo sa bunga sa ilang kahago
![Gealon Racing Team mipupo sa bunga sa ilang kahago](https://media.philstar.com/photos/2024/04/23/galeon_2024-04-23_00-38-37.jpg)
CEBU, Philippines — Tangkod 14 ka semana sukad sila naporma, ang mga atleta sa Gealon Racing Team sa hinay-hinay mipupo sa bunga sa ilang paningkamot ug dedikasyon.
Si Cebu City Councilor Rey Gealon miestablisar sa GRT niadtong Pebrero 23, 2023 sa tinguha nga magabaton og lagsik ug malipayon nga istilo sa kinabuhi ug sa susamang higayon dasigon ang mga kabatan-onan mga mosud sa kalibutan sa paugnat sa kusog aron makalikay sila sa tentasyon sa droga ug uban pang mga bisyo.
Gikuyogan mismo sa kapikas niyang si Fiscal Jill Ann Gealon, ang ubang mga sakop sa team mao sila si Fiscal Hazel Caraballe, Ronald Sarmago Alex Cabando, Limito Caraballe Jr., Mikko Laguda, ug Chester Rago. Sila si Gealon ug Caraballe parehong nagsilbe nga prosecutors sa National Prosecution Service sa Department of Justice nga anaa makabase sa Cebu City Prosecutor’s Office.
Nagparamdam sa ilang presensiya sa multi-sport nga eksena dinhi sa Sugbo, ang mga pambato sa GRT misidlak sa tulo ka sunod-sunod nga dagkong mga kompetisyon nga ilang gisalmotan ning bag-ohay pa lamang. Una niini, ang GRT mihimo og kasikas sa TWM Triathlon didto sa San Francisco, Camotes niadtong Abril 6.
Si Hazel Caraballe milugwa nga kampiyon sa women's 35-45 age group sud sa tulo ka oras ug pito ka minuto. Sila si Sarmago ug Limito Caraballe nakamdelya sab sa ilang mga kategoriya.
Usa ka semana ang milabay, ang GRT mikuha og atensiyon atol sa Leg 1 sa HOKA Trilogy Run Asia-Cebu.
Si Caraballe mipatak og usa ka oras ug 25 minutos hinungdan nga gibayaw siyang labing paspas sa women's 16km class, samtang si Cabando mipahiluna sa ikatulong dapit sa seniors division sud sa usa ka oras ug 48 minutos.
Sila si Gealon, Caraballe, ug Laguda mikadlit og personal records sa tagsa-tagsa nila ka mga kategoriya.
Niadto lamang Domingo, ang GRT nakalingkawas sa labing lisud nilang hagit, ang makutas nga Ironman 70.3 Lapu-Lapu Cebu didto sa Mactan Newtown.
Ang GRT mipakita'g aksiyon sa relay event diin si Ronald Sarmago ang mikumbati sa 1.9km swim, si Hazel Caraballe sa 90km bike, ug Gealon sa 21km run. Sa kinatibuk-an, mirehistro sila og pito ka oras ug 37 minutos apan ang labing mahinungdanon nakumpleto nila ang makutas nga karera taliwala sa naglagiting nga kainit sa udtong tutok, butang nga ilang ikapasigarbo uban ang malipayon nga kasingkasing.
"GRT is hoping to inspire more people who will be interested in multi-sport discipline especially the youth who will eventually raise the flag with pride competing abroad," matud pa ni Gealon kabahin sa buot nilang makab-ot sa umaabot.
- Latest