Lee, Andrin nanghawod
![Lee, Andrin nanghawod](https://media.philstar.com/photos/2024/04/08/3_2024-04-08_00-20-29.jpg)
Gikoronahang kampiyon sa Milo Marathon-Mandaue leg
Emmanuel B. Villaruel
CEBU, Philippines — Sila si Prince Joey Lee ug Cherry Andrin maoy gikoronahang mga kampiyon sa 21-kilometer division sa Milo National Marathon 2024-Mandaue City leg sayo kagahapon sa buntag.
Sa men's 21K, si Lee maoy labing paspas human gihuman ang makutas nga lumba sud lamang sa usa ka oras, siyam ka minuto ug 509 segundos.
Ang mga kauban ni Lee sa Spectrum Running Club nga sila si Jovan Bensig ug Darwin Locaylocay mipahiluna sa ikaduha ug ikatulong dapit sa oras nga 1:13:51 ug 1:15:11.
Sa women's division, si Andrin misakmit sa una niyang titulo sa 21K human nangharos sa mas mubo nga distansiya sa miagi niyang mga karera.
Mitunob si Andrin sa finish line sa oras nga 1:27:56. Layo kaayo ang biya niya ni Jamine Cruz, nga miangkon sa ikaduhang puwesto sa oras nga 1:34:50. Si Kay Cundangan ang na-3rd sa oras nga 1:36:40.
Pipila pa ka Spectrum runners ang misidlak diin sila si Mark Mahinay ug Asia Paraase midominar sa 10K category.
Si Mahinay mitapos sa unang dapit sa men's 10K sa oras nga 32:31, labaw lamang og 10 segundos ni Kenyan Eric Chipsiror. Si Andrew Kim Remolino, nga sakop sa Philippine triathlon team, mikubit sa ikatulong dapit sa oras nga 33:21.
Sa iyang bahin, si Paraase ang rayna sa women's 10K sa oras nga 39 minutos ug sayes segundos. Si Raven Faith Alcoseba, nga miyembro sab sa national triathlon team, nalandig sa ikaduhang dapit sa oras nga 42:06 ug gisundan kini ni Nicole Del Rosario sa oras nga 46:48.
Sa 5K, ang top 3 mao sila si Arcelo Oswaldo, Jr. (15:56), Shin Irvin Ragadio (16:17) ug Angelo Quiniquito (16:21) sa men's ug Jeanly Mata (18:29), Cathy Lingcong (19:24), ug Melanie Pulgo (20:01) sa women's.
Sa laing bahin, sila si Kyle Abarquez (11:29) ug Ziah Ares (12:55) maoy labing paspas sa 3K.
- Latest