Embiid padayong nanginit uban sa Sixers

CEBU, Philippines — Wala gihapoy pilde ang Philadelphia 76ers sud sa tulo ka duwa sukad sa pagbalik sa alas nilang si Joel Embiid.

Ang labing uwahi nilang gi-ihaw mao ang Memphis Grizzlies.

Si Embiid mipaulbo og 30 puntos sa dihang gilampaso sa Sixers ang Grizzlies, 116-96, sa NBA kagahapon didto sa FedExForum sa Memphis, Tennessee.

Sa iyang pagtikang og balik sa korte gikan sa duha ka bulan nga pahuway tungod sa injury, gitabangan ni Embiid ang Sixers pagpakurat sa inilog nga Oklahoma City Thunder.

Human niini, ang 30-anyos nga All-Star forward mikadlit og 29 puntos sa dihang gipabugnaw sa Sixers ang Miami Heat.

Nagpadayon ang pagmangtas ni Embiid, ning higayona batok sa Grizzlies diin siya milangkat sab og 12 ka rebounds ug duha ka blocks.

Tungod niini, ang Sixers nagpabilin sa ikawalong puwesto sa Eastern Conference bitbit ang 43-35 rekord.

Sa ubang resulta, ang Los Angeles Lakers miposte sa ikaupat nilang sagunson nga daog human gidemolis ang Cleveland Cavaliers, 116-97, samtang ang defending champion Denver Nuggets mipasukarap sa Atlanta Hawks, 142-110.

Si D'Angelo Russell maoy nangu sa Lakers uban ang 28 puntos.

Si LeBron James mi-iskor og 24 samtang si Anthony Davis midugang og 22 puntos ug 13 ka rebounds alang sa Lakers, nga midaog sa ikasiyam na nga higayon sa miagi nilang 10 ka duwa ug ikawalo karon sa West uban ang 45-33 nga baraha.

Sa laing bahin, si Nikola Jokic mibulsa sa ika-25 niyang triple-double ning season uban ang 19 puntos, 14 ka rebounds ug 11 ka assists alang sa Nuggets nga nag-una karon sa West uban ang 54-24 nga marka. Sikit hinoon kaayong nagsunod kanila ang Minnesota Timberwolves (53-24) ug ang OKC Thunder (52-25).