Varga, Buytrago bigo sa Japanese sa Beach Tour

MANILA, Philippines — Bigo mang maiposte ang ikalawang sunod na panalo ay nakuha pa rin ni­na Pinoy beach volleyball spikers Rancel Varga at James Buytrago ang top spot sa kanilang grupo sa preliminaries ng Smart Asian Volleyball Confe­de­ration (AVC) Beach Tour Nuvali Open kahapon.

Nakatikim sina Varga at Buytrago ng 22-20, 26-28, 13-15 kamalasan kina Ja­panese Kosuke Fukishima at Hiroki Dylan Kurokawa sa world-class Nuvali Sand Courts by Ayala Land sa Sta. Rosa, Laguna.

Nauna nang umiskor sina Varga at Buytrago ng straight win kina Yogi Her­mawan at Ketut Ardana ng Indonesia para upuan ang No. 1 seat sa Pool H pa­tungo sa Round of 16.

Sunod na lalabanan ng 5-foot-10 na si Varga at ng 6-foot-1 na si Buytrago sina Bintang Akbar at Sofyan Efendi ng Indonesia.

Natalo ang Indonesian pair kina Paul Burnett at Jack Pearse ng Australia, 12-21, 16-21.

Samantala, naglista rin ng 1-1 marka sina AJ Pa­reja at Ran Abdilla sa Pool D at haharapin sa Round of 16 sina Abdolhamed Mir­zaali at Abolhassan Kha­kizadeh ng Iran.

Sa women’s division, yu­mukod sina Pinay bets Alexa Polidario at Jen Gaviola kina Japanese Riko Tsujimura at Takemi Nishibori, 5-21, 4-21, para sa ka­nilang 0-2 record.

Sa iba pang resulta wa­gi sina Desi Ratnasari at Nur Atika Sari ng Indonesia kina Anastassiya Ukolova at Mariya Peressetskaya ng Kazakhstan, 21-13, 17-21, 15-12.

Dinaig nina Pat­cha­raporn Seehawong at Sa­mit­ta Simarongnam ng Thailand sina Singaporean Eliza Chong at Huiying Ang, 21-12, 21-10, sa event na suportado ng Foton, Aka­ri, Mikasa, Senoh, Se­da, Asics, Cignal, One Sports, One Sports+ at Pil­ipinas Live