Kababayan niyang si Jerusalem WBC belt ang tirada

Si Jake “El Bambino” Amparo sa PMI Bohol Stable mo-atubang sa labing dako nga away sa iyang karera sa dihang iyang hagiton ang way pildeng Hapon nga defending champion nga si Ginjiro Shigeoka alang sa International Boxing Federation (IBF) minimumweight title karong adlawa (Dominggo, Marso 31) didto sa International Conference Hall sa Nagoya, Japan.

Kining maong away nasabotan niadto lamang miaging lima ka adlaw.

Ang 26-anyos nga si Amparo nahatagan ning dako nga oportunidad batok ni Shigeoka human ang kababayan niyang si ArAr Andales mi-atras sa away tungod kay nagkaproblema sa iyang timbang.

"Bisan tuod late replacement ang atong boxer, isog nga gidawat niya ang hagit nga modula sa talagsaon nga chance nga makadula sa usa ka world title bout. Naghinaot ug nangayo kami sa inyong pag-ampo ug suporta," matud pa ni PMI Boxing head Atty. Floriezyl Echavez Podot.

Usa kini ka bulawanong higayon nga wala palabya ni Amparo ilabi na kay napilde siya pinaagi sa unanimous decision batok ni kanhi world champion Pedro Taduran sa ilang IBF title eliminator sa miagi niyang away niadtong Disiembre 28 didto sa Bohol Wisdom School (BWS) Gym sa Tagbilaran City.

“Maningkamot ta atong makuha. I-apil ko sa inyong pag-ampo, unta suportahon ko ninyo,” padayag pa ni Amparo pinaagi sa Facebook live ni PMI matchmaker Edito "ALA" Villamor.

Si Amparo, nga lumad gikan sa Guindulman, Bohol, nagbitbit og 14-5-1 win-loss-draw rekord uban ang 3KOs, samtang si Ginjiro nagtangag og perpektong 10-0 nga marka uban ang 8KOs.

Dehado man tuod siya apan si Amparo mahimong mokuha og inspirasyon sa una niyang away didto sa Japan diin iyang gibuntog si Goki Kobayashi pinaagi sa unanimous decision aron labnihon ang WBO Asia Pacific 105-pound belt niadtong Agosto 5, 2023 didto sa Central Gym sa Kobe, Japan.

Sa susamang card, ang kababayan ni Amparo nga si Melvin "El Gringo" Jerusalem (21-3, 12KOs) sa ZIP/Sanman Gym makigharong sa kampiyon nga si Yudai Shigeoka  (8-0, 5KOs) alang sa World Boxing Council (WBC) minimuweight title.

Ang 30-anyos nga si Jerusalem naglaraw nga mamahimong two-time world champion. Nagkupot siya kanhi sa korona isip WBO mini-flyweight champion human gipatikangkang sa ikaduhang hugna si Masataka Taniguchi apan wala makalahutay sa iyang trono gumikan kay gi-knockout ni Oscar Collazo sa Puerto Rico sa ikapitong hugna sa una niyang depensa.