Curry nanginit sa iyang pagbalik
![Curry nanginit sa iyang pagbalik](https://media.philstar.com/photos/2024/03/17/3_2024-03-17_23-55-11.jpg)
CEBU, Philippines — Si Stephen Curry nanginit dayon sa iyang pagbalik diin kini mipabuto og 31 puntos aron ituboy ang Golden State Warriors ngadto sa 128-121 nga pagpayaka sa Los Angeles Lakers sa NBA kagahapon didto sa Crypto.com Arena sa LA, California.
Ang 36-anyos nga four-time NBA champion wala makapakita'g aksiyon sa miaging tulo ka duwa sa Warriors tungod kay na-injured ang tiil.
Wala matay-i si Curry sa iyang pagtikang og balik sa korte. Gawas sa eksplosibo niyang opensa diin siya mipasud og 12 sa 24 niya ka itsa, milangkat sab siya og unom ka rebounds ug lima ka assists.
Midugang si Klay Thompson og 26 puntos, si Jonathan Kuminga mi-iskor og 23 puntos, samtang si Draymond Green miamot og 12 puntos ug 13 ka assists sa Warriors.
Si LeBron James mibugwak og 40 puntos apan nakawang ang iyang paningkamot alang sa Lakers, nga napiangan kay si Anthony Davis wala makatiwas og duwa kay nanayayay ang mata sa unang kuwarter.
Sa laing bahin, si Jalen Williams mipupo og 23 puntos, pito ka rebounds ug unom ka assists sa dihang ang Oklahoma City Thunder naka-angkon og bahin sa liderato sa Western Conference human gitumba ang Memphis Grizzlies, 118-112.
Ang Thunder ug ang defending champion Denver Nuggets nagtabla karon sa kinatas-ang bahin sa liderato sa West bitbit ang managsamang 47-20 rekords.
Ang Minnesota Timberwolves mipaduol kanila og usa na lang ka duwa human gipayaka ang Utah Jazz, 119-100, luyo sa kombinasyon nilang Anthony Edwards ug Mike Conley nga nagkumboya'g 56 puntos.
Sa ubang mga resulta, si Jalen Brunson mipabuto og 42 puntos aron aswaton ang New York Knicks ngadto sa 98-91 nga pagpakaging sa Sacramento Kings, si Tyrese Maxey mikolekta og 30 puntos sa dihang gipaksit sa Philadelphia 76ers ang Charlotte Hornets, 109-98, si Pascal Siakam mihipos og 28 puntos ug 11 ka rebounds sa dihang gipakaging sa Indiana Pacers ang Brooklyn Nets, 121-100, samtang sila si C.J. McCollum ug Zion Williamson nagkumboya'g 56 puntos sa dihang gilampaso sa New Orleans Pelicans ang Portland Trail Blazers, 126-107.
- Latest