Vitor nakalingkawas sa makuyaw nga sitwasyon mi-ko sa Koreano aron sakmiton ang WBO oriental belt

TAGBILARAN CITY, Philippines - Si Virgel "El Valiente" Vitor nakalingkawas sa makuyaw nga sitwasyon sa ikaduhang hugna dayon na ngadto sa pagpatukay-ang sa lig-on kaayong Koreano nga si Tae Sun Kim sa usa ka eksplosibong panapos sa "Kumong Bal-anon 14" nga gipasiugdahan sa PMI Bohol Boxing Promotions niadtong Biyernes sa gabii, Marso 8, dinhi sa Saulog Gym.

Ang 26-anyos nga si Vitor nag-agi og makalisang nga kahimtang sa dihang hapit siya patikangkanga ni Kim sa hilimatyong segundos sa ikaduhang hugna.   

Apan kay nabuligan og suwerti,  si Vitor dalaygon nga namawi aron pakatulgon ang agresibo kaayong Koreano nga bisita sa ikapitong hugna ug langkaton ang  World Boxing Organization (WBO) Oriental super featherweight belt.

"Gikulbaan gyud ko og maayo atong puntoha. Misaka ang akong dugo ug galisud ko'g ginhawa tungod sa kakuyaw. Maayo na lang paspas iyang recovery tungod kay kondisyon siya," matud pa ni PMI Boxing promoter ug manager Atty. Floriezyl Echavez Podot agi'g pagpadayag sa iyang gibati niadtong nahagba si Vitor.

Atol sa mainiton nga pagbinukbukay sa duha ka mga boksidor, si Vitor maoy unang mipalukapa ni Kim sa sayong bahin sa ikaduhang hugna.

Apan si Kim dali nga nakarekober ug human niini iyang gibaslan si Vitor nga iyang gipasukarap gamit ang makusog niyang suntok ngadto sa ulo.

Nagkalipong-lipong ug nakakita pa og mga bitoon, si Vitor nakamaneho pagbarog apan klaro kaayong wa pay umoy ang iyang mga paa ug katumbahon.

Nagdanga-danga na unta sa kapildihan si Vitor apan sa dihang tiwasan na unta siya ni Kim, mibagting ang kampana ug nasalbar siya.         "Napawong gyud akong panan-aw atong tungora pero tungod kay duna koy kaisog, determinado gyud ko nga makabarog," paambit pa ni Vitor kon giunsa niya pagsugakod ang maong makapaisag balahibo nga higayon.

Nadungagan ang kompiyansa human maka-angkon og laing kinabuhi, si Vitor maisogon nga miresbak gikan sa ikatulong hugna ngadto na sa tunga-tungang bahin sa gikatakda nilang 10 ka hugna nga sinukmagay.

Taliwala sa padayon nga paghilam-osay og kumo ang duha ka mga protagonista, si Vitor kalit lang nga miatupa og makabungog  nga right straight ngadto sa apapangig nga nakapahagsa sa Koreano diha-diha ibabaw sa ring.

Sa dihang naghigda si Kim ug nagping-it sa kasakit samtang naglisud og ginhawa, si reperi Danrex Tapdasan wala na mag-usik pa og oras aron undangon ang away sa nahibilin nga 49 segundos sa ikapitong hugna.

"Kon tagaan og chance maka-away og world title, bisan kinsa nila nga world champion akong banggaon," deklara pa ni Vitor human giinat ang iyang rekord ngadto sa 22-3 nga gidayan-dayan na karon og 15KOs. Si Kim nakatilaw sa ikaduha pa lamang niya nga pilde sud sa 15 ka away uban ang duha ka tabla ug 8KOs.       

Sa supporting main event, ang way pildeng "Cebuano Assassin" nga si Remart Tagacanao ( 8-0, 7KOs) gikan sa Napo, Carcar City mipakamang ni  Indonesian Hamson Lamandau sa ikaunom nga hugna aron birahon ang World Boxing Association (WBA) Asia super flyweight title.

Sa laing bahin, si WBO Asia-Pacific minimumweight champion Christian Balunan gikan sa Consolacion, Cebu midemolis sa beteranong si Clyde Azarzon sa Big Yellow Stable sa Cebu City sud lamang sa duha ka hugna aron paburoton ang perpekto niyang rekord ngadto sa 10-0 nga gidayayan-dayanan na karon og 6KOs.  (