Wenceslao wala gihapoy pilde uban sa ARQ, milabni sa WBF Australasia welterweight title

CEBU, Philippines — Padayong naglupad si Rodel "The Hulk" Wenceslao ubos sa mga pako sa ARQ Gym. Sa usa ka dominanteng salida, si Wenceslao mikadlit og TKO nga kadaogan sa ikaunom nga hugna batok  sa kababayan niyang si Ernie Sanchez sa General Santos City atol sa main event sa "Engkwentro 12:Binombahay sa Cawayan" niadtong Biyernes sa gabii, Marso 8, nga gisaksihan sa bagang panon sa mga mahiligon og boksing didto sa Cawayan Sports Complex sa Cawayan, Masbate. Gawas nga giinat ang way pilde niyang rekord ngadto sa 7-0 sukad siya gisagop sa ARQ dul-an sa duha ka tuig na ang milabay, ang garbo sa Kananga, Leyte mibira sab sa korona sa World Boxing Foundation (WBF) Australasian welterweight division.

"Wala gyud ko magdali nga ma-knockout siya. Ang ako lang modaog ko sa puntos matag round," matud pa ni Wenceslao, nga nagkupot na karon og 21-19-2 nga baraha uban ang 10KOs. Ang unang bakos ni Wenceslao sa iyang karera seguradong makahatag kaniya og dugang kompiyansa ug kadasig nga maka-away alang sa world title sa umaabot. "Siyempre lipay kaayo ko kay sukad sa akong pagsulod sa ARQ niadtong 2022, straight akong daog sa pito na ka away," batbat pa ni  Wenceslao.

"Dako akong kalipay ilabi na kay nadaog nako ang WBF title. Mapasalamaton kaayo ko sa ARQ Boxing ilabi na sa among promoter ug manager nga si sir Jason Arquisola nga iya ko gihatagan ani nga oportunidad," padayon pa niya.

Nadoble ang kalipay sa 30-anyos nga si Wenceslao tungod kay ang iyang mga katropa sa ARQ nagmadaogon sab ubos sa paggiya ni head trainer Eldo Apawan Cortes ug conditioning coach Roger Justine Potot.

Si Bryx "The King" Piala (9-1, 3KOs) mipatigbabaw pinaagi sa unanimous decision batok ni Ken Jordan sa GenSan, samtang si Yerroge Gura mibuntog ni Kier Clenton Espere pinaagi sab sa unanimous decision.  Ang way pildeng si Berland "The Triggerman" Robles (10-0-1, 4KOs) nagtabla ra hinoon ug si  kanhi  world title challenger Robert "Inggo" Paradero. Gideklara nga technical draw ang ilang sangka sa dihang  si Paradero dili na makapadayon og away tungod kay nakahiagum og gisi sa iyang ulo gikan sa aksidenteng headbutt. Sa laing bugno, si Angelus Pilapil sa siyudad sa Sugbo mipukan sa pambato sa Masbate nga si Mark Sabang pinaagi sa split decision.