Aksiyon sa cecaba mobalik na karon
CEBU, Philippines — Human sa lima ka tuig nga way kisaw, ang Cebu Eastern College Alumni Basketball Association (CECABA) mobalik sa eksena alang sa ika-17 nga season sa tinuig nilang Dr. Chen Lieh Fu Memorial Cup karong adlawa didto sa Cebu Coliseum.
"With the blessings of our founder Chester Cokaliong, we decided to revive CECABA to continue its legacy being one of the oldest and best organized alumni-based cage leagues in Cebu," matud pa ni CECABA President Joel Chan sa Batch '85.
Katapusan silang nakapahigayon og torneyo niadtong 2019 sa wala pa ang pandemiya.
"Due to the strong clamor of our fellow alumni, we decided to bring back CECABA. We hope for the best as we look forward to its success," dugang pa ni Chan.
Sa dili pa ang aksiyon sa korte, usa ka simpleng seremonyas sa pagbukas ang ipahigayon nga pagasugdan sa sa tradisyonal nga parada sa mga teams sa ala-1 sa hapon.
Molamas sa mubo nga programa ang pagpili sa best muse ug paghagpat sa best uniform.
Sa dili pa kini mahitabo, si Cokaliong, nga maoy nagtukod sa CECABA niadtong 1999 luyo sa maanindot niyang tinguha nga ipagayon ang panaghigala ug panagdait sa mga Easternians graduates pinaagi sa sport nga duol sa ilang dughan, gipaabot nga mohatag og makapadasig nga mensahe.
Human niini, si Cokaliong motikang dayon sa korte sa unang higayon sud sa 12 ka tuig. Katapusan siyang mipakita og aksiyon sa CECABA sul-ot ang uniporme sa Batch '78 niadto pang 2012.
Sa edad nga 63 anyos, si Cokaliong usa sa duha na lamang ka CECABA legends nga nagpabiling aktibo sa liga. Ang laing usa mao ang way pagbahar nga si Zotico "Tuco" Tan nga hait gihapon sa edad nga 78 anyos.
Isip all-time leader sa 3-point shooting, ang abilidad ni Cokaliong masukod dayon sa dihang ang iyang team makigsangka batok sa seleksiyon sa mga players gikan sa nagkalain-laing mga batch sa pasiunang duwa.
Sa kinatibuk-an, 16 ka mga koponan ang magbangga ning tulo ka bulan nga torneyo.
- Latest
