Junior Altas ikinasa ang 4-0 record
MANILA, Philippines — Ipinagpatuloy ng University of Perpetual Help ang kanilang arangkada matapos gibain ang San Beda, 78-56, sa Season 99 junior basketball tournament kahapon sa Filoil EcoOil Arena sa San Juan City.
Umiskor si Jan Pagulayan ng team-high 19 points para sa 4-0 record ng Junior Altas, habang humakot si Mark Gojo Cruz ng 15 markers at 12 rebounds.
Nag-ambag si slam-dunking Lebron Jhames Daep ng 10 points, 6 boards, 3 steals at 1 block.
Bagsak ang Red Cubs, nakahugot kay MJ Vailoces ng 13 markers, sa 2-2.
Ito ang ikalawang sunod na kabiguan ng San Beda matapos magtayo ng 2-0 marka.
Inilista rin ng mainit na Mapua Red Robins ang 4-0 kartada matapos ang 72-57 pagpapatumba sa Jose Rizal Light Bombers na laglag sa 1-3.
Humataw si Lawrence Mangubat ng 25 points para banderahan ang Red Robins na hangad ang ika-21 korona.
Samantala, pinabagsak ng St. Benilde Junior Blazers ang Arellano Braves, 85-81, para sa unang panalo mula sa 0-3 panimula.
Tumipa si Guillian Quines ng 22 points para sa Junior Blazers.
- Latest
