Tatum mi-agak sa Celtics vs Nets

CEBU, Philippines — Si Jayson Tatum mipatuasik og 41 puntos sa iyang double-double sa dihang gipayaka sa Boston Celtics ang Brooklyn Nets, 118-110, sa NBA kagahapon didto sa Barclays Center sa Brooklyn, New York.

Gawas sa eksplosibo niyang opensa, si Tatum milangkat sab og 14 ka rebounds ug lima ka assists.

Wala sab magpabitin si Jaylen Brown nga midugang og 19 puntos sa ikalima nilang sagunson nga daog.

Sila si Al Horford ug Derrick White parehong mitimbre og 16 puntos alang sa Celtics, nga miinat sa labing nindot nga rekord ning season ngadto sa 42-12.

Sa laing duwa, ang Oklahoma City Thunder mipaksit sa Orlando Magic, 127-113.

Sila si Jalen Williams ug Shai Gilgeous-Alexander nagkumboya'g 65 puntos alang sa Thunder nga madasigong mibangon human mabiyai og 11 puntos sa unang kuwarter aron pahagbaon ang Magic.

Naghari sa Western Conference, ang Minnesota Timberwolves pabiling naglabaw og usa ka duwa sa Oklahoma City human gipakaging ang Portland Trail Blazers, 121-109.

Si Anthony Edwards mibomba og 41 puntos alang sa Timberwolves, nga nagbitbit og 38-16 nga baraha, usa ka duwa lamang ang gintang nila sa Thunder nga adunay 37-17 nga marka.

Didto sa Phoenix, ang Suns nakalingkawas human malubong og 11 puntos sa ikatulong kuwarter aron tumbahon ang Sacramento Kings, 130-125.

Si Kevin Durant ang bida ang Suns uban ang 28 puntos, samtang sila si Devin Booker ug Eric Gordon nagkumboya'g 48 puntos.   

Didto sa Los Angeles, gitiwasan sa Lakers ang nangiwit nga Detroit Pistons, 125-111, ubos sa pagpangu ni LeBron James nga mipupo og 25 puntos.