Heat kuwang og tawo apan mikastigo sa Bucks

CEBU, Philippines — Ang Miami Heat kuwang og tawo apan mihimo'g usa ka dakong surprisa human ilang gilampornas ang inilog apan nagkagidlay nga Milwaukee Bucks, 123-97, sa NBA kagahapong adlawa didto sa Fiserv Forum didto sa Milwaukee, Wisconsin.

Napiangan og maayo ang Heat kay wala ang tulo ka nanga-angol nilang mga sinaligan nga sila si Jimmy Butler, Terry Rozier, ug Josh Richardson.

Apan ang Heat milusad og usa ka eksplosibong opensa aron pakauwawan ang Bucks didto sa korte niini.

Si Nikola Jovic maoy nangu sa Heat uban ang 25 puntos apil niini ang lima ka 3-pointers, samtang si Duncan Robinson miposa og unom ka tres sa iyang 23 puntos.

Sa kinatibuk-an, ang Heat milansang og 19 sa 40 ka gibirada nilang tres.

Apil sab sa nagkayong ataki sa Heat si Kevin Love nga mi-igo og lima ka tres sa iyang 19 puntos.

Ang Heat nagkupot na og 29-25 rekord ug ikapito sila karon sa Eastern Conference.

Si Giannis Antetokounmpo mihipos og 23 puntos samtang sila si Malik Beasley, Damian Lillard ug Bobby Portis mitali og 16 puntos matag usa apan silang tanan naminghoy kay ang Bucks nadakin-as sa 35-20.