Managsoong Lim mibira og duha ka mga korona
![Managsoong Lim mibira og duha ka mga korona](https://media.philstar.com/photos/2024/02/12/1_2024-02-12_01-23-36.jpg)
CEBU, Philippines — Ang managsoong Dylan Jared ug Drexler Jordan Lim milangkat og duha ka managlahing kampiyonato uban sa Sacred Heart School-Ateneo de Cebu (SHS-AdC) Magis Eagles sa basketball event sa bag-ohay pang natapos nga Palarong Mandaue 2024 nga maoy qualifying event sa dakbayan alang sa Central Visayas Regional Athletic Association (CVIRAA) Meet karong summer.
Si Dylan Jared kabahin sa SHS-Ateneo team nga milabni sa koronaq sa secondary boys 5x5 basketball, samtang si Drexler Jordan mipakita'g aksiyon uban sa Magis Eagles nga nanghawod sa 3x3 event uban nilang Aaron Abutazil, John Wilhelm Go, ug Kirk Doyohim.
Miangkon si Dylan nga naka-angkon siya og duhang motibasyon nga maningkamot og maayo alang sa iyang koponan human milampos ang iyang manghud.
"Pasalamat gyud ko sa Ginoo na nasulod akong manghud sa 3x3 lineup ug na-champion mao nalipay kaayo ko para niya ug sa iyahang mga kauban kay panagsa rapud ni na magkuyog mga igsoon nga na-champion at the same time sa league," paambit pa ni Dylan nga mikuha'g atensiyon kay way sipyat sa gibirada niyang tulo ka 3-pointers aron pagkadlit og 11 puntos sa 65-48 nilang paglampornas sa University of Cebu Lapu-Lapu and Mandaue (UCLM) Baby Webmasters sa ilang gold-medal match tangkod usa ka semana na karon didto sa Mandaue City Cultural and Sports Complex.
"Bisan naa siya sa 3x3, at least nakuha gyud nila ang kadaugan mao determined pud ko to do my very best for the team," dugang pa niya.
Karon, gisaytan ni Dylan ang CVIRAA karong Mayo uban ang panghinaut nga makarepresenta siya sa rehiyon sa ikatulong sunod-sunod nga higayon.
Sa dihang anaa pa siya sa grade school sa wala pa ang pandemiya lima ka tuig na ang milabay, si Dylan gikuha aron palig-onon ang puwersa sa University of the Visayas (UV) Baby Lancers alang sa 2019 Palaro didto sa Davao City. Sa miaging tuig, sakop siya sa Magis Eagles nga milugwa nga kampiyon sa secondary boys basketball sa Palaro didto sa Marikina City.
"Hinaot karong tuiga makuha gihapon namo ang kadaugan inubanan og prayers sa atong Ginoo," batbat pa sa 17-anyos nga 11th grader.
"Sa akong mga na-achieve, thankful kaayo ko sa mga misalig nako. Sa SHS-Ateneo de Cebu community, sa among president sa school si Fr. Mike Pineda, head coach Rommel Rasmo and the rest of the coaching staff, sa among athletic director si sir Ralph Inot, and of course doc Rhoel Deja o ug sa akong pamilya labi na sa akong daddy Dex ug mommy Jenny nga supportive kaayo namo always."
Si Drexler malipayon sab sama sa iyang maguwang sa nakab-out nilang kalamposan.
"Pasalamat gyud ko ni Jesus Christ nga na-champion mi sa 3x3. Lipay kaayo ko para sa akong coach nga nisalig namo sa akong teammates," dasdon pa sa 15-anyos nga si Drexler, nga milansang og krusyal nga mga free throws sa kulbahinam nilang 19-15 nga daog batok sa Paknaan National High School ballers sa pinal nilang sangka.
"At first, kuyawan mi kay twice-to-beat among kontra, but our hearts and determination define our willingness to be a champion. Naninguha gyud mi sa akong mga teammates nga ma-sealed namo ang kadaogan para makakuyog ko sa akong brother Dylan sa CVIRAA," padayon pa ni Drexler.
Uban ang tumang kalipay ug garbo sa ilang dughan, ang talagsaon nga kaluhang bulawan nilang Dylan ug Drexler usa ka butang nga seguradong ilang handumon ug sa tibuok nilang kinabuhi dili nila mahikalimtan.
- Latest