Legasiya ni Kobe gisemento sa LA Lakers
CEBU, Philippines — Ang Los Angeles Lakers pormal nga mipakita sa publiko sa gipahimo nilang rebulto ni Kobe Bryant agi'g pagyukbo sa usa sa labing bangiitan nga mga players sa kasaysayan sa ilang prangkisa.
Ang bronse nga estatuwa nga dunay gitas-on nga 19 ka tiil ug gibug-aton nga 4,000 ka libre nagpakita ni superstar guard Bryant uban sa iyang No.8 Lakers jersey diin ang usa niya ka kamot nagtudlo sa hangin.
Nagbarog kini gawas sa home court sa Lakers diin si Bryant miwadwad sa labing ngilngig niyang mga salida atol sa mabulokon niyang karera.
"This statue may look like Kobe, but really, it's what excellence looks like," matud pa sa laing Lakers legend nga si Kareem Abdul-Jabbar agi'g pagdayeg ni Kobe.
Ang five-time champion ug 18-time NBA All-Star nga si Bryant miduwa alang sa Lakers gikan sa 1996 ngadto sa 2016 sa wala pa siya namatay sa usa ka helicopter crash upat ka tuig na ang milabay.
Ang Lakers nagsul-ot og "Black Mamba" jerseys agi'g paghandum ni Bryant apan nabaraw ang mahinungdanon nilang gabii human sila gipilde sa defending champion Denver Nuggets, 114-106.
Si Jamal Murray maoy nangu sa Nuggets uban ang 29 puntos ug 11 ka assists.
Si Michael Porter Jr. mikadlit og 27 puntos samtang si Nikola Jokic miamot og 24 puntos, 13 ka rebounds ug siyam ka assists alang sa Nuggets nga nakigsawo karon sa Minnesota Timberwolves sa liderato sa Western Conference bitbit ang managsamang 36-16 rekords.
Si Anthony Davis miharos og 32 puntos ug siyam ka rebounds samtang si LeBron James midugang og 25 puntos, siyam ka rebounds ug pito ka assists apan nangahoyhoy ang ilang abaga gumikan kay napakgang ang tulo ka sagunson nga daog sa Lakers.
- Latest
