Grand reunion sa Green Lancers uv basketball greats nasentro sa atensiyon

CEBU, Philippines — Gawas sa paglab-as sa mabulokon nilang kagahapon ug ingon man pakighugoy-hugoy sa mga higala nga dugay na nilang wala igkita, ang mga bangiitang magduduwa nga nakasul-ot kanhi sa uniporme sa University of the Visayas (UV) Green Lancers gipasidunggan sab atol sa malampuson nilang Grand Reunion ning bag-ohay pa lamang.

Mikuha og atensiyon sa mahinungdanong kalihukan nga gipahigayon didto sa Chiong's residence didto sa dakbayan sa Naga mao ang mga "Living Legends", champion coaches, ug UV players nga nakatikang sa Philippine Basketball Association (PBA).

Apil sa listahan sa mga "Living Legends" sila si Manolo "Manny" Paner, Robert "Bobby" Callelero, Raymundo "Monding" Chua, Zotico "Tex" Tan, Filomeno "Minoy" Chuntic, Sim "Tito" Achumbre, Carlito "Lito" Singson, Vitaliano "Vit" Porio, Arturo Gerasmio, ug Raul Latonio.

Ang mga dekalibreng coaches nga gihatagan og rekognasyon naglangkob nilang Eduardo "Eddiegul" Gullas, Justiniano "Ening" Completo, Eduardo Mendoza Sr., Oligario "Gary" Cortes, Jonil "Jomags" Maglasang, Elmey "Boycabs" Cabahug, Alfonso "Al" Solis, Delfin "Pafom" Pepito Jr., Ronald "Ronbucz" Bucao, Diosdado "Judy" Vilango, Felix "Donbel" Belano Jr., Jerry Aratan, Ferdinand "Bong" Pineda, Abel Bungcaras, Hermes Sumalino, ug Tong Abelado.

Gibayaw sab ang mga PBA players nga nahulma sa mga Visayanians sud sa nanglabayng mga katuigan.

Gawas nilang Paner, Solis, Belano, ug Cabahug, ang mga Green Lancers nga napakaitang aksiyon sa labing unang propesyonal nga liga sa Asya mao sila si Max Delantes, Bonel Balingit, Alejo "Ponky" Alolor, Eduardo "Eddieboy" Mendoza Jr., Marlowe Jacutin, Paul Velasco, Willie Generalao, Jay Ramirez, Jerry Pingoy, Woodrow Balani, Oscar Rocha, Renato Alforque, Bryan Heruela, Bruce Dacia, Stephen Padilla, Marvis Dennison, Willy Velasco, Jayford Roqriguez, Ariel Mepaña, Derick Bughao, Oliveros Dalman, Jojo Lim, JR Quiñahan, Montoy Singson, Peter Naron, Paul Desiderio, Rey Suerte, Tata Fernandez, Lowell Briones, Greg Slaughter, ug Anthony Mendoza.

Sa wala milahos sa ilang programa, ang mga organizers nga gipangulohan ni Terry Bolo nga usa ka retiradong sakop sa US Army mibisita usa sa lubnganan ni anhing Jose "Dodong" R. Gullas sud sa motherhouse compound sa Daughters of Sta. Teresa didto sa Barangay Valladolid, dakbayan sa Carcar.

Didto miyukbo sila ni Dodong Gullas, nga dili lamang usa ka champion player, coach, ug team manager apan gilantaw sab nga amahan ug maayong ehemplo sa tanang UV Lancers.

Ilang gitak-op ang memorable nilang panagtapok-tapok pinaagi sa paghatag og boluntaryong donasyon alang sa ilang mga igsoon nga nanginahanglan kaayo og tabang.

Buot kini nila himoon nga pundasyon sa plano nilang tukoron nga UV Lancers Foundation uban ang tinguha nga mahatagan og ayuda ang labing nanginahanglan nilang mga kaubanan.