Araneta nagmalampuson sa ikatulong higayon mipatikangkang ni Magramo sud lamang sa usa ka hugna

CEBU, Philippines — Ug ang gikaintapang "The Bomb" sa Omega Gym mikab-ot niini sa makalisang nga paagi human iyang gipatikangkang si Arvin "The Hurricane" Magramo sa Elorde Stable sud lamang sa usa ka hugna sa ilang International Boxing Federation (IBF) light flyweight eliminator nga maoy main event sa "Kumbati 16" fight card sa Omega Sports Promotions International niadtong Biyernes sa gabii didto sa Nustar Resort and Casino Convention Center.

"Dako kaayo ko og kalipay gyud kay ang amo gipangandoy ni coach Jinggoy (Junco)nakab-ot na gyud namo," matud pa ni Araneta. "Ikatulo na ni nako nga eliminator so grabi gyud ang pag-ampo nako ani kay ni-aksiyon na baya ko nga dili na gyud kon dili nako makuha kining ikatulo so giduyogan gyud mi sa Ginoo nga makuha namo ni."

Ang mangtas nga boksidor gikan sa lungsod sa Borbon amihanang bahin sa Sugbo mi-angkon hinoon nga wala siya magdahum nga ingon ato kasayo mahuman ang away.

"Wala gyud ko mag-expect nga ako siyang ma-knockout og sayo kay kahibawo ko naa sab siya'y kusog ug maayo sab. Pero sa akong huna-huna nga ako siya ma-igo og kusog ba itodo gyud nako," padayon pa ni Araneta.

Mao gyud kini ang nahitabo sa dihang si Araneta mipatupa sa nakatatak na niyang left uppercut ngadto sa apapangig nga nakapahagba ni Magramo sa unang higayon sa nakaon nga usa ka minuto pa lamang sa iyang sangka.

Nakapanimaho og dugo, ang 28-anyos nga si Araneta wala na maglangay pa pagpakatikangkang ni Magramo sa hingpit gam it angf makusog nga left hook ngadto sa ulo.

Si Magramo misuway og bangon sa ikaduhang higayon apan klaro kaayong wala na kini umoy ug nagkalipong-lipong na og maayo hinungdan nga napugos si reperi Danrex Joseph Tapdasan pag-undang sa away sa oras nga 1:50 sa unang hugna.

Gawas nga miinat sa iyang rekord ngadto sa 24-2 nga gidayan-dayan na karon og 19KOs, si Araneta naka-angkon sab og katungod nga mo-away alang sa IBF 108-pound title nga kasamtangang gikuptan ni Adrian "Gatito" Curiel sa Mexico.

"Andam na kaayo ko nga mo-away alang sa world title kay mao gyud nay akong gusto ug bisan kinsa sa mga champions karon sa akong dibisyon akong atubangon kon mahatagan og higayon," dason pa ni Araneta said.

Ang katropa ni Araneta sa Omega nga si Benny Cañete (10-1, 7KOs) naka-iskor sab og first-round knockout batok ni Thai Phissanu Chimsunthom.

Si Cañete kalit lang nga milandig og makusog nga suntok sa tiyan nga nakapasukarap sa bisitang Thai ug wala na makabarog pa. Opisyal nga gihunong ni reperi Rey Caitom ang bugno sa oras nga 2:53 sa unang hugna.

Sa supporting main event, ang Hapon nga si Keita Kurihara (18-8, 16KOs) misakmit og balik sa iyang trono isip Oriental and Pacific Boxing Federation (OPBF) bantamweight champion ug ingon man gibira ang ang IBF Asia bantamweight belt human gi-TKO si Froilan "The Sniper" Saludar sa ikawalong hugna. (BANAT NEWS)