Bahay Eagles gihapon, magpabilin sa Ateneo
CEBU, Philippines — Ang Sugbuanong basketbolista nga si Jared Bahay nakahukom nga motungha sa Ateneo de Manila University sa kolehiyo ug mosul-ot sa uniporme sa Blue Eagles sugod sa UAAP Season 87 karong tuiga.
Kining maong lakang nagtuldok sa mga spekulasyon kon asa padung si Bahay human siya mi-atras gikan sa nahauna niyang gisaad sa University of the Philippines (UP) Fighting Maroons.
"I’m attending Ateneo de Manila University because I want to continue my education in another Jesuit school. In addition, the opportunity to play right away is another reason I considered in making this decision," matud pa ni Bahay, ang Juniors MVP sa miaging Cebu Schools Athletic Foundation, Inc. (CESAFI) Season 23 human gitabangan ang Sacred Heart School-Ateneo de Cebu (SHS-AdC) Magis Eagles pagkab-ot og talagsaong three-peat.
Tungod niini, ang giilogan nga talento gikan sa Barangay Mambaling, dakbayan sa Sugbo dili lamang maghiusa og balik sa kanhi niya mga teammates sa Magis Eagles nga sila si Raffy Celis ug Michael Asoro apan hasta sab sa mga kauban niya sa Batang Gilas nga sila si Mason Amos, Kyle Gamber, ug Kobe Demisana.
Usa ka eksplosibong point guard, ang 18-anyos nga si Bahay mao gyud ang gipangita nga lider sa korte sa Blue Eagles human sa pagbiya ni Forthsky Padrigao sa miaging tuig ug sa pagsud ni Jared Brown sa kalibutan sa propesyonal nga liga.
- Latest
