Nuggets sapaw sa 76ers
![Nuggets sapaw sa 76ers](https://media.philstar.com/photos/2024/01/17/3_2024-01-17_23-28-28.jpg)
PHILADELPHIA — Humakot si Joel Embiid ng 41 points at 10 assists para pamunuan ang 76ers sa 126-121 pagpapatumba sa nagdedepensang Denver Nuggets.
Ito ang ika-18 sunod na 30-point game ni Embiid para pantayan si Hall of Famer Elgin Baylor para sa sixth-longest streak sa NBA history.
Nagdagdag si Tyrese Maxey ng 25 points at may 24 markers si Tobias Harris para sa Philadelphia (26-13).
Humakot si Nikola Jokic ng 25 points at 19 rebounds para banderahan ang Denver (28-14) na nakahugot kay Jamal Murray ng 17 points at 10 assists.
Ang free throw ni Embiid ang nagbigay sa 76ers ng 118-113 abante kasunod ang kanyang three-pointer para sa kanilang eight-point lead.
Huling naghamon ang Nuggets sa 116-120 mula sa tatlong free throws ni Michael Porter Jr. sa nalalabing 26.6 segundo.
Sa Los Angeles, kumana si Paul George ng season-high 38 points para tulungan ang Clippers (26-14) sa 128-117 paggupo sa Oklahoma City Thunder (27-13).
Sa Phoenix, ipinasok ni Kevin Durant ang dalawang free throws sa huling 1.8 segundo at bumangon ang Suns (22-18) mula sa 22-point deficit para sa 119-117 pagtakas sa Sacramento Kings (23-17).
- Latest