Leonard nagpahigot sa LA Clippers
CEBU, Philippines — Si two-time NBA champion Kawhi Leonard mipirma og tulo ka tuig nga contract extension uban sa Los Angeles Clippers.
Kini nagpasabot nga si Leonard magpabilin sa Clippers hangtud sa 2027 season.
Si Leonard maoy Finals MVP sa dihang nakadaog siya og titulo uban sa San Antonio Spurs niadtong 2014 ug ingon man sa Toronto Raptors niadtong 2019 sa wala pa siya mobalhin sa Clippers.
Ang Clippers wala mohatag og dugang detalye sa lab-as nilang kasabotan apan gitaho sa ESPN nga si Leonard makadawat og $153 million sud sa tulo ka tuig.
"We re thrilled to continue our relationship with Kawhi. He is an elite player, a terrific partner and a relentless worker who knows how to win and makes it his first priority," matud pa ni Lawrence Frank, ang presidente sa basketball operations sa Clippers.
"He elevated our franchise from the moment he arrived. We feel fortunate that Kawhi chose to join the Clippers five years ago and excited to keep building with him," dugang pa ni Frank.
Sa 12 ka seasons niya sa NBA, si Leonard, nga lima ka higayon nahimong All Star ug kaduha gibayaw nga NBA Defensive Player of the Year, adunay average nga 19.8 puntos, 6.4 rebounds, 3.0 assists ug 1.7 steals matag duwa.
Ning season, si Leonard mipatak og 23.8 puntos ug 6.1 rebounds matag duwa alang sa Clippers, nga ikaupat karon sa Western Conference bitbit ang 23-13 rekord.
Gawas ni Leonard, buot sab sa Clippers nga ipabilin si Paul George sa ilang poder.
- Latest
