Morant mihimo'g kasikas sa iyang pagbalik

CEBU, Philippines — Si Ja Morant mikuha dayon og atensiyon sa iyang pagbalik gikan sa 25 ka duwa nga suspensiyon.

Kini human si Morant mipasud sa iyang layup dayong kapupos sa oras aron aswaton ang Memphis Grizzlies ngadto sa 115-113 nga kadaogan batok sa New Orleans Pelicans sa NBA kagahapong adlawa didto sa Smoothie King Center sa New Orleans, Louisiana.

Ang buzzer-beater ni Morant nagtuldok sa impresibo niyang salida diin siya mipabuhagay og 34 puntos, walo ka assists ug unom ka rebounds sa iyang pagbalik human gipahamtangan og 25 ka duwa nga suspensiyon gumikan sa sunod-sunod niyang post sa social media diin siya makita nga naggunit og pusil.

Daw sa gitay-an man tuod siya sa sinungdanan ug naluya sa naghinapos nga bahin sa duwa apan iyang nabuhat ang gihandum sa Grizzlies gikan kaniya.

"I ain't played a game in eight months. Had a lot of time... a lot of hard days where I went through it," matud "But you know, basketball is my life, what I love, therapeutic for me and I'm just excited to be back."

Sa laing aksiyon, ang Golden State Warriors miwani sa Boston Celtics sud sa overtime, 132-126, samtang si Damian Lillard mipaulbo og 40 puntos sa dihang gilatigo sa Milwaukee Bucks ang San Antonio Spurs, 132-119.

Si Warriors superstar Stephen Curry mibubo og 13 sa iyang 33 puntos sa katapusang kuwarter ug pito sa overtime aron tabangan ang Warriors nga makabangon human malubong og 17 puntos. Didto sa Milwaukee, si Lillard nahimong ika-51 nga NBA player nga mikadlit og 20,000 puntos sa ilang karera.