Lancers, Baby Jaguars mikulit og kasaysayan

CEBU, Philippines — Ang University of the Visayas (UV) Green Lancers ug ang University of San Jose-Recoletos (USJ-R) Baby Jaguars mitak-op sa eliminasyon pinaagi sa pagkulit og kasaysayan sa Cebu Schools Athletic Foundation, Inc. (CESAFI) Season 23 Men's Basketball Tournament niadtong Dominggo didto sa Cebu Coliseum.

Yanong gitumba sa defending champion Lancers ang University of Southern Philippines Foundation (USPF) Panthers, 70-54, aron pagkumpleto og 10-game sweep sa eliminasyon, nga labing una nahitabo sukad ang liga nakahakot og 11 ka mga partisipateng koponan sa college division.

Sa ilang pag-angkon sa numero unong puwesto, ang Lancers dunay twice-to-beat advantage batok sa USJ-R Jaguars sa Final Four sunod semana.

Ang USJ-R ug USPF nagtabla unta uban ang parehong 7-3 nga baraha apan ang Panthers maoy mibira sa ikatulong dapit tungod sa winner-over-the-other rule.

Bukid pa hinoon gihapon ang tungason sa Panthers kay sunod nilang banggaon mao man ang twice-to-beat nga University of Cebu (UC) Webmasters.

Sa juniors category, ang USJ-R Baby Jaguars nakalingkawas batok sa University of Cebu Lapu-Lapu and Mandaue (UCLM) Baby Webmasters, 61-57, aron paglugwa nga No.1 qualifier padung ngadto sa semifinals.

Bitbit ang 9-1 win-loss rekord, ang Baby Jaguars mitapos nga top seed sa labing unang higayon sukad sa pagkahimusgo sa liga niadtong 2000.

Tungod niini, ang Baby Jaguars magabaton og twice-to-beat nga bentaha batok sa UV Baby Lancers sa semis.

Samtang ang UCLM natagak sa ikatulong puwesto ug makigsangka batok sa twice-to-beat nga defending champion Sacred Heart School-Ateneo de Cebu (SHS-AdC) Magis Eagles sa sunod nga hugna sa kompetisyon.