IM Joel Pimentel naghari sa CEPCA 33rd anniversary tourney
CEBU, Philippines — Si International Master Joel Pimentel maoy midominar sa Cebu Executives and Professionals Chess Association (CEPCA) 33rd Anniversary Tournament nga giulohan og "4th Engr. Boy “Chessmoso” Pestano Memorial Cup” didto sa Cebu Chess Club sa Robinsons Galleria Cebu ning bag-ohay pa lamang.
Midaog si Pimentel sa nag-una niyang walo ka mga duwa batok nilang Jesse Tan, Rex Arreglado, Joel Pacuribot, Bonn Rainauld Tibod, Allan Pason, M Kim Steven Yap, Venancio Loyola Jr., ug FIDE Master Nelson Villanueva sa wala pa siya gipilde ni Yves Christian Fiel sa ikasiyam ug katapusang hugna.
Bisan pa man niini, si Pimentel gihapon ang milugwa nga kampiyon sa torneyo nga gipaluyohan sa Jemar Engineering Services, Celjem Construction and Development Corporation, ug ARQ Sports isip major sponsors. Nagtabla sila ni Loyola nga mihipos sab og 8.0 puntos apan si Pimentel ang mibulsa sa P10,000 nga unang ganti gumikan sa mas taas niyag tiebreaker.
Si National Master NM Rommel Ganzon mipahiluna sa ikatulong dapit samtang si Fiel nalandig sa ikaupat nga puwesto. Naglangkob sa top 10 mao sila si Villanueva, Daniel Baylosis, NM Rogelio Enriquez Jr., Ariel Reyes Abellana, Ronald Ganzon ug Richard Natividad.
- Latest
