33rd anniversary tourney sa CEPCA kasado na
CEBU, Philippines — Andam na ang tanan alang sa 33rd Anniversary Tournament sa Cebu Executives and Professionals Chess Association (CEPCA) nga giulohan og "7th Engr. Boy "Chessmoso" Pestaño Memorial Chessfest" karong Dominggo, Oktubre 22, didto sa Cebu Chess Club nga anaa mahimutang sa 4th level sa Robinsons Galleria Cebu duol sa cinema area.
Ning higayona, ang makampiyon tunolan sa Jun Olis Trophy agig pagyukbo ni Cebu chess patron Apolonio "Jun" C. Olis Jr., usa ka diehard Cepcan nga mitaliwan ngadto sa laing kalibutan ning bag-ohay pa lamang.
"Just like what we did to our CEPCA founder (Boy Pestaño), we will also honor the legacy of the late Jun Olis by naming our championship trophy after him," matud pa ni CEPCA president Engr. Jerry Maratas. "Through this, we will be able to immortalize these two great Cepcans."
Gawas sa espesyal nga tropeyo, ang maghari sa torneyo nga gipaluyohan sa Jemar Engineering Services, Celjem Construction and Development Corporation, ug ARQ Sports isip mga major sponsors mobulsa og P10,000.
Ang mopahiluna sa ikaduha ngadto sa ikaunom nga dapit makadawat og P6,000, P4,000, P3,000, P2,000, ug P1,500. Ang 7th ngadto sa 10th dunay P1,000 matag usa, ang 11th-15th P700, ug 16th-25th P500.
Ang top 2 Cepcans (A ug B) dunay insentibo nga P1,000 ug P500 samtang ang top 2 seniors, ladies, ug U8, U12, U16, ug U20 players mokubra og P700 ug P500 nga bonus.
Ang rehistrasyon nagkantidad og P200 alang sa seniors, ladies, Cepcans ug 14-under ug P300 alang sa regular nga mga partisipante.
Alang sa dugang detalye mahimong mokontak ni Kevin Yap sa 0945-8559800.
- Latest
