Lamac kampiyon sa senior category A sa 12th Alegado Cup
CEBU, Philippines — Ang Team Lamac milupig sa Pulpogan sa labing sikit nga iskor, 91-90, sa makutas ug kullbahinam nilang kampiyonato aron birahon ang korona sa senior category A sa 12th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si Joven Cid Cortes ang mibida sa Lamac ni coach Edsel Vallena uban ang 23 puntos.
Mitali si James Daniel Ferraren og 17 puntos samtang si Joseph Cabahug midugang og 15 puntos alang sa Lamac, nga madasigong mibangon human mabiyai og 10 puntos sa halftime, 48-58, aron pakagingon ang Pulpogan.
Alkansi gihapon og singko puntos, 71-76, human sa tulo ka kuwarter, ang Lamac milusad og bagsik nga ataki sa naghinapos nga bahin sa duwa aron pakuratan ang Pulpogan og usa lamang ka lugas pagkahuman sa makapaisa'g balahibo nilang engkwentro.
Sila si Russel Moneva ug JC Escalona nagkumboya'g 43 puntos apan nakawang ang ilang paningkamot sa kampo sa Pulpogan.
Sama sa miaging mga edisyon, ang tinuig nga torneyo nagmalampuson ubos sa superbisyon
ni SK Federation President Carlos Donn Flores, ang overall sports chairman, ug sa iyang co-chair nga si konsehal Marilou Casul.
Si Paul Alelu Flores maoy nagsilbeng league commissioner inabagan nilang Lee Mhar Dahil, Agvin Jugan, ug Cromwell Cuenca isip deputy commissioners ug Stephen Ababon isip echnical head.
- Latest
