Didal nangiwit, pakyas pagdepensa sa iyang korona

CEBU, Philippines — Napakyas ang Sugbuanong si Margielyn Didal pagpanalipod sa iyang trono isip women's skateboard champion sa Asian Games.

Ang mas nakapait kay mitapos siya sa ikawalo ug katapusang dapit sa paborito niyang event.

Si Didal nagkalisud nang daan sa first ug second runs pa lamang sa una niyang trick human siya natagak ug klaro nga nasakitan.

Wala sab niya mabuhat ang ikatulo niyang trick sa ikaduhang run hinungdan nga misurender na lamag siya sa nahibilin nga otso segundos.

Tungod sa nahiaguman niyang angol sa iyang tiil, wala na makumpleto pa ni Didal ang una niyang trick.

Wala sab mahuman ni Didal ang ikaduha niyang trick tungod kay ang iyang pulso ang nayayay ning higayona kay iyang gituko sa yuta sa dihang natagak na sab siya.

Natiwasan pa ang kalbaryo ni Didal sa ikatulo niyang trick diin siya nagkalisud pagkuha sa iyang balanse. Wala na siya mosuway pa sa pinal niyang duha ka tricks hinungdan nga nalabay siya sa kinatumyang puwesto.

Ang pambato sa China nga si Cui Chenxi maoy mibira sa gold medal samtang ang kababayan niining si Zeng Wenhui ang mipugnit sa silver. Si Miyo Itu sa Japan ang milabni sa bronze.