Canada mitagak sa Spain, US nakatilaw og pilde
CEBU, Philippines — Gipalagpot sa Canada ang defending champion Spain sa ikaduhang hugna sa 19th FIBA Basketball World Cup aron pag-abante sa quarterfinals uban ang Italy, Serbia ug Latvia.
Samtang ang inilog nga Team USA nakatilaw sa una nilang pilde sa mga kamot sa Lithuania, 104-110, apan ang duha ka teams parehong kwalipikado na sa Final 8 uban ang Germany ug Slovenia ni NBA superstar Luca Doncic.
Ang US ug Canada kwalipikado na sab alang sa 2024 Paris Olympics isip top 2 teams gikan sa Americas human nangatagak ang Puerto Rico, Dominican Republic ug Brazil.
Ang Spain ug Canada parehong nagbitbit og 3-0 nga baraha human sa group stage.
Apan ang Cadana maoy mipatigbabaw, 88-85, sa tinagakay nilang duwa.
Mitikang sab ang Latvia sa sunod nga bahin sa torneyo human gilampornas ang Brazil, 104-84.
Ang Latvia, nga mipakita og aksiyon sa World Cup sa labing unang higayon, mihimo nang daan og impresyon human gipangbihag ang Spain ug Tokyo Olympics silver medalist France.
Sa laing bahin, ang Italy mipayaka sa Puerto Rico, 73-57, arok pagmartsa ngadto sa quarterfinals sa unang higayon sukad niadtong 1998.
- Latest
