Koponan gikan sa Cebu pwede sa PBA?
CEBU, Philippines — Kun tugotan ug mauyonan sa tanang kadagkoan sa Philippine Basketball Association ang gihugon-hugonang ‘expansion’, may kahigayonan na unya ang mga Bisaya nga makaangkon og koponan para sa maong asosasyon ug tsansa sa mga lokal nga talento nga mosidlak.
Usa sa mga dakong uyon niini ang tagiya sa Blackwater nga si Dioceldo Sy. Matud pa niya sa report sa Spin.ph, dako iyang pagtuo nga makaayo para sa PBA ang pagdawat og mga koponan gikan sa mga dagkong kompanyang nagbase sa Visayas ug sa Mindanao.
Lakip sa iyang gipanganlang mga lugar nga adunay bagang tigsuporta sa PBA ug dunay daghang talentadong players mao ang Cebu, Davao, Cagayan de Oro, GenSan, Zamboanga Bacolod, o sa Iloilo nga diin gihimo ang usa sa mga duwa sa PBA All-Stars niadtong Marso ning tuiga.
Matud pa niya, ang Cebu ug Davao usa sa mga gitawag nga “basketball hotbeds” sa Visayas ug Mindanao, parehas kini sa Manila ug Pampanga sa Luzon.
Si Sy miingon nga ang tagiya mismo sa Cebu Landmasters giingong interesado kaayo nga moapil sa liga, gisugyot niya nga kinahanglang dunay himuong exploratory talks bahin niini.
"I welcome the (PBA) expansion. I know maraming interested diyan from the South. The PBA should open up the invitation," matud pang Sy sa Spin. ph.
Ang pamahayag ni Sy maoy iyang reaksyon sa pamahayag ni PBA Commissioner Willie Marcial nga pwedeng mag-expansion ang PBA, pwedeng pun-an pa og duha ngadto sa upat ka koponan.
Kun mahitabo kini, dili lang ang mga lokal nga players ang malipay kondili hasta sab ang mga fans aron makatan-aw sa linawas nga duwa sa ilang mga idolong players pinaagi sa home-and-away format.-IBM
- Latest
