Clarkson moduwa sa World Cup, Brownlee sa Asian Games

CEBU, Philippines — Gibutyag ni Gilas Pilipinas coach Chot Reyes nga daan na nilang gusto nga si Jordan Clarkson maoy prayoridad nga himuong naturalized player alang sa umaabot nga FIBA World Cup sa sunod buwan.

Sa  interbyu kaniya sa CNN Philippines Sports Desk Miyerkules sa gabii, subling gitug-an ni Reyes nga mao gyud ilang gusto nga moduwa sa Pilipinas si Clarkson.

Bisan gani ang sikat nga PBA import nga si Justin Brownlee nakahibalo bahin niini ug nakasabot siya sa rason. Apan si Reyes mibutyag nga dili mawad-an og tsansa si Brownlee nga makadala sa Bandila sa Pilipinas sa international tournament, kay siya maoy naturalized player sa Gilas sa umaabot nga Asian Championship sa buwan sa Septiyembre.

“It has always been Jordan Clarkson [as the planned naturalized player] from the start. Brownlee [was brought in] as a backup, as a contingency plan. Justin knew that fully well,” matud pang Reyes.

“But still, nothing you can take anything from Justin. What a great job he has done, great sacrifice, dedication, commitment and the heart of a Filipino,” pagsaludo pang Reyes kang Brownlee.

Niadtong Agusto 6, gikompirmar ni Clarkson nga moduwa siya sa Gilas. Kini human sa pipila ka adlaw nga nagpaabot ang Gilas sa iyang desisyon tungod sa daghang mga giatiman didto sa Amerika sa iyang kontrata sa NBA.

Sa duha ka higayong niduwa sa Gilas,  ang kanhi  NBA Sixth Man of the Year mi-average og 25 points, 5.5 rebounds ug 6.5 assists ug 45.2% shooting batok sa Lebanon ug Saudi Arabia. Pabor sab kini nga desisyon para ni Brownlee kinsa padayong nagmulo sa iyang bone spur injury aron hingpit siyang maayo ug piskay ang lawas ini og duwa na niya sa Asian Games.

 “But now that Jordan is already confirmed, Justin, the medical team, the coaching staff and the management, we all decided that Justin takes care of that bone spur already so he will be 100% by the time of the Asian Games,” puno pa sa coach.

Sa pikas bahin, samtang tuod nipirma na og kasabotan si 7’3 center Kai Sotto nga moduwa sa Gilas Pilipinas sa umaabot nga FIBA World Cup sa sunod buwan, kinahanglan pa niya nga motunga sa praktis sa koponan ayha siya pasudlon atol na sa torneyo sumala pang Gilas head coach Chot Reyes.

Sa interbyu kang Reyes sa CNN Philippines’ Sports Desk mipirma na si Sotto sa kasabotan niadtong adlaw nga Miyerkules usa ka adlaw human mipadayag si Clarkson nga moduwa sab sa Pilipinas.

“Kai finally signed the agreement this morning. But, then again, signing the agreement and actually showing up in practice are two different things,” dugang pasabot ni Reyes. Gibutyag sab niya nga walay nakitang dakong problema ang mga doktor sa nasinating panakit sa likod ni Sotto atol sa ikaduha unta nga nahimong kataposan niyang duwa sa Orlando Magic sa NBA Summer League sa sayo ning buwana.

“If he wants to be a big part of the team, he needs to come in early, as soon as possible. We are planning to play him a lot in the China games, but he has to come to practice to earn those minutes. If he is not in practice, then he will not even be playing in China,” dugang pang Reyes.

Si Sotto mipakita palang sa Gilas atol sa  tune-up game batok sa Ateneo sa nakalabay nga semana ug nitungha sab kini niadtong Martes apan wala moapil sa training. — IBM