Gilas Pilipinas Girls U16, mi-sweep sa Division B

CEBU, Philippines — Gilampaso sa Gilas Pilipinas Girls ang Iran sa FIBA U16 Women’s Asian Championship sa Prince Hamzah Hall, City of Amman sa Jordan, nahuman ang dula sa final score na 83-60.

Gipabuhagay na tanan sa mga dalagitang Gilas sa kataposan nilang duwa sa torneyo batok Iran ug sa ilang kalamposan ma promote na sila sa Division A.

Nagkalisud sila sa unang tulo ka minutos sa duwa, nag commit pa sila og tulo ka turnovers, dili ikalimud nga alkansi ang Gilas basta height ang hisgutan, apan ang strategy ug diskarte maoy nagpatigbawbaw sa duwa. Nahuman ang first quarter sa iskor nga 20-15 pabor sa Gilas girls.

Nangamote ang team Iran pagabot sa second quarter sa oras na 7:47 ang iskor sa Gilas 29 samtang sa Iran nalansang gihapon sa 15.

Nakahimo pa sila og pito ka turnovers nga maoy nakapaabante sa mga batang Pinay nga gikapinan pa sa ilang nagkainit nga opensa, ang Gilass naka shoot pa og upat ka tres. Nahuman ang second quarter sa iskor na 38-26 pabor sa Gilas.

Pag abot sa third quarter, nakabawi ang team Iran apan mas gipahugtan sa Gilas ang depensa hangtud nitak-op ang kwarter sa iskor nga 59-45.

Pagsugod sa fourth quarter, determinado ang Gilas nga daugon ang duwa ni iskor pa sa og 24 ka puntos sa sulod sa 10 ka minutos nakalabaw sila og 27 puntos ug wala na hatagi pa og tsansa ang Iran.

Ang opensa sa Gilas gipangulohan ni Naveah Smith nga mipusa og 21 puntos, mipuno si Ava Fajardo og 12 points nga maoy nagdala sa koponan sa kinataposang kwarter, samtang nidugang sad ug 10 puntos si Ariel dela O.

Dako og natampo sa depensa si Alyssia Palma nga nitala og 11 rebounds, duha ka blocks ug walo ka puntos.

Ang ilang kadaugan maoy ilang bawos sa ilang kapakyasan sa miaging tuig. Karon, giharos nila ng Division B nga walay pildi ug gipanglubong taga liog ang mga kontra sama sa nahitabo sa Maldives nga gitabunan og 122 puntos sa iskor nga 144-22 .

Unang gikastigo sa Gilas ang Hong Kong, 79-40, Maldives, 144-22, ug ang host Jordan, 106-58 dayon sa semifinals mao ang Malaysia, 79-44.

Ang kadaugan sa Gilas girls maoy naka pa promote nila ngadto sa Division A nga diin nakapwesto ang mga higanteng koponan.

Makauban na nila sa Division A ang mga maguwang nila nga Gilas Pilipinas Women sa FIBA Women’s Asia Cup Division A nga nakadaog ug na-promote sab sa moang division didto Sydney, Australia sa miaging buwan.

Ang sunod nga tournament ipahigayun og balik sa tuig 2025 ug makigsangka ang Gilas sa mga lig on nga nasud nga naa sad na butang sa Division A.