Kai Sotto na-injured, nameligro iyang NBA dream

CEBU, Philippines — Daw naminghoy ang mga Pinoy fans ni Kai Sotto human nga kini naangol sa likod atol sa iyang ikaduha untang duwa sa Orlando Magic batok Boston Celtics kagahapon sa nagpadayong NBA Summer League didto sa Thomas and Mack Center sa Las Vegas.

Napulo ra  ang lineup sa Magic maong siguradong mahatagan og taas nga oras si Sotto sa pagduwa ug kahigayonan na gyud unta niya nga mapakita ang 100 porsiyeno sa iyang abilidad nga magpalaway sa mga NBA scouts ug mismo sa Magic aron siya kuhaon.

Sa unang kwarter palang, gipasulod na si Sotto sa ika-3:33 minutos ug ning tungora kontrolado nila ang duwa  sa iskor nga 8-13.

Apan nakahimo dayon og turnover si Sotto. Sa pagpadayon sa duhwa, hinayhinay nga nakaapas ang Boston. Natapos ang kwarter sa iskoe  nga 16-20 pabor na sa Boston. Sa ikaduhang kwarter, padayon ang pagpamuntos sa Boston 30-25 ug makita nga nihinay ang lihok ni Kai. Si Kai nirehistro lang og duha ka rebounds, usa ka assist ug walay puntos.

Ang Magic nawala sad sa ilang momentum samtang Boston namuntos na og maayo.

Pagabot sa third kwarter, migawas na si Sotto ug miadto sa locker room. Didto nasuta nga giagwanta lang niyang ang kasakit sa iyang likod atol sa duwa.

Tungod niini, wala na siya pabalika og duwa. Gilubong na og maayo sa Boston ang Magic sa iskor na 77-57. Hangtud nga midaug ang Boston sa final score nga 94-77. Nanghipos ang Magic pagawas sa Summer League nga wala gyuy bisan usa ka daog.

Pipila sa mga fans ni Kai ang nadismaya sa nahitabo, apan duna say uban malaumon pa gihapon nga matuman ang damgo niini nga makasulod sa NBA, apan dili pa gyud karong panahona.

“I hope his back is okay,” matud pa sa agent ni Sotto nga si Tony Ronzone nga nakahinabi sa Philstar.com pagkahuman sa duwa.

Sa laing interview kang Sotto, siya miingon nga nakapamati na siya og sakit sa iyang likod gikan sa pagsugod palang sa duwa, apan iyaha lang kining giagwanta aron makaduwa sa ikaduhang higayon.

Si Sotto nitapos sa iyang unang NBA Summer League nag average lang og  tulo ka puntos, tulo ka rebounds, 1.5 blocks ug usa ka assist batok sa Trailblazers ug Boston.

Tungod sa nahitabo, nagkagamay ang tsansa ni Sotto nga mahatan og offer  NBA o sa G league o ba kaha two-way contract gikan sa Magic o ubang NBA team.

Kung dili niya kini makuha karon, hayan nga mobalik kini og duwa sa iyang koponan sa Hiroshima Dragonflies sa Japan B. League diin naa pa siyang kontrata.

Pipila sa mga netizens nga fans ni Kai ang nadismaya sa nahitabo, ang uban kanila nagduda nga ang pagpadako ni Kai sa iyang lawas maoy gidudahan nilang hinungdan tungod kay namatikdan nga nausab iyang dinuwaan sa NBA Summer League kun itandi sa iyang mga lihok didto sa National Basketball League sa Australia ug sa Japan B League.

Dili pa hinuon kini kataposan sa damgo ni Kai, tungod kay 21-anyos pa siya og duna pay panahon aron palig-unon iyang lawas para sa NBA.