SEA Games King Eric Cray nakasud sa semis

CEBU, Philippines —  Milampos si Southeast Asian Games king Eric Cray nga makasulod sa semifinals sa 400-meter hurdles human siya nahimong mananaog sa upat ka mga qualifying heats sa Asian Athletics Championships sa Bangkok, Thailand.

Si Cray, 34, eight-time gold medallist sa SEA Games nakatala og 50.39 segundos ug nidaog sa Heat 2 ug naangkon sab niya ang usa ka spot sa nagpadayon karon nga 16-man semis atol ning pagsulat sa balita.

Kinahanglang molampos si Cray sa semis aron makasulod sa finals ug maangkon og balik ang bulawang medalya nga iyang nakuha niadtong 2017 sa Bhubaneswar, India.

Kun palaron pa gyud nga makuha ni Cray ang 48.70 segundos nga qualifying time para sa Paris Olympics, mas labing maayo. Hinuon dili kini imposible para kang Cray tungod kay nakuha niya ang 48.98 segundos pito ka tuig na ang nilabay didto sa Madrid, Spain.

Kung dili man sa AAC, duna pa siyay usa ka tuig aron makasulod sa Paris Olympics pinaagi sa ubang kompetisyon nga qualifying tournaments para sa maong prestihiyosong kompetisyon.

Sa pagkakaron, ang world no. 3 pole-vaulter palang nga si EJ Obiena ang kwalipikadong Pilipino nga makaduwa sa Olympics.