Fil-Am moduwa sa utah jazz
CEBU, Philippines — Dili lang ang 7’3–footer nga si Kai Sotto ang Filipino nga gikatakdang moduwa sa umaabot nga Summer League karong sunod buwan, kun si Kai moduwa ubos sa Orlando Magic ang laing Pinoy nga nangambisyon sab makaduwa sa NBA adto sa Utah Jazz.
Siya si Kihei Clark, kinsa wala mapili sa bag-ohay lang natapos nga NBA Rookie Draft. Si Clark gikatakdang moduwa para sa Utah Jazz sa Summer League, una sa Salt Lake City, dayon sa Las Vegas, Nevada karong sunod semana.
Dili parehas ni Sotto nga usa ka higante, si Clark 5-foot-10 lamang ug posisyon nga guard ang dinuwaan niini. Produkto si Clark sa Virginia Cavaliers nga maoy nakadaog sa US NCAA championship niadtong tuig 2019.
Nakatala siya og 10.7 points, 5.4 assists, 2.6 rebounds ug 1.0 steal sa iyang senior years una pa siya midesider nga motaak sa NBA.
Ang Filipino-American standout nakaduwa sab dinhi sa Pilipinas kauban si Jalen Green sa nahitabong NBTC All-Star Game niadtong 2018.
Si Clark napiling All-Star Game MVP ug mismo si Philippine basketball legend Robert Jaworski Sr. pa gyud ang nitunol kaniya sa iyang tropeyo.
Si Clark naapil sa Utah’s first round picks kauban nilang Taylor Hendricks (No. 9), Keyonte George (No.16) ug Brice Sensabaugh (No. 28) sa umaabot nga sangka nila batok sa Oklahoma City, Philadelphia ug Memphis karong Hulyo 3 hangtud Hulyo 6 sa Salt Lake , dayon sangkaon na sab nila ang Minnesota, Denver ug Phoenix sa Hulyo 7 hangtud 17 sa Las Vegas.
Sama kang Sotto, si Clark nagtinguha sab nga makasulod sa NBA sama sa kababayang si Jordan Clarkson. (BANAT NEWS)
- Latest
