Smart, DLS palalakasin ang Esports sa Pinas

MANILA, Philippines — Magtatambal ang Smart Communications, Inc. at Dark League Studios (DLS) para lalo pang isulong ang Esports at mabigyan ng pagkakataon ang mga kabataan na umangat sa buhay.

Katuwang ng dalawang kumpanya ang Philippine Esports Organization (PESO) para maisakatuparan ang kanilang misyon.

“Through our collaboration with DLS, we hope to empower more aspiring Esports athletes to level up their gameplay and compete in a much bigger arena,” sabi ni PLDT Inc at Smart Communications President at CEO Al Panlilio.

Inihayag din ng Smart ang pagpapalakas ng Smart GIGA Arena na ang unang all-in-one na Esports platform ng bansa na nag-aalok ng karanasan sa tournament para sa mga baguhang manlalaro ng Mobile Legends: Bang Bang, Call of Duty Mobile, Player’s Unknown Battleground, at League of Legends Wild Rift.

Ang tambalan ay magbibigay-daan sa Smart na palakihin pa ang GIGA Arena sa pagpapalaganap ng mga tuntunin ng mga tournament, mas makabuluhang interaction ng mga gamers at maayos na lugar para sa baguhan at beteranong gamers.

Mula nang ilunsad noong 2022, ang Smart GIGA Arena ay nakapagho-host na ng mahigit 2 milyong users na nakalahok sa mahigit 1,000 torneo na may kabuuang P4.2 milyong papremyo.

Nangako rin ang Smart at DLS ng malaking pagbabago sa kalidad ng mga gamers sa pakikipagtulungan sa PESO para mapanatili ang pinakamataas na pamantayan ng integridad ng laro.

Parehong naghahanda ang Smart at DLS na makipag-ugnayan sa mas maraming Filipino gamers sa mga bagong tournament at pinahusay na feature sa GIGA Arena platform.

“We share Smart’s vision for Philippine Esports, and we are excited to leverage our expertise and experience in engaging the gaming community and inspiring Filipino gamers to fulfill their dream,” wika ni Alfrancis Chua, ang Co-Founder at Chief Marketing Officer ng DLS.