Pacquiao gisaytan isip kontra ni Ryan Garcia
CEBU, Philippines — Milutaw na sab ang pangan ni boxing legend Manny Pacquiao alang sa usa ka laing away. Kini human ang kampo ni Ryan Garcia gikataho nga nagplano nga iparang ang sikat nga batan-ong boksidor batok ni Pacquiao.
Sigun pa ni Michael Benson sa talkSPORT.com, mismo ang promoter ni Garcia nga si Oscar De La Hoya sa Golden Boy Promotions ang mipalutaw sa ideya kabahin ni Pacquiao isip potensiyal nga kontra alang ni Garcia.
“Manny vs Ryan, you know how huge that would be? I’m gonna pursue that and we’ll see what the best option is for Ryan,” padayag pa ni Benson sigun sa gisulti ni De La Hoya ngadto kaniya.
Si Garcia napilde sa miagi niyang away diin siya natikangkang tungod sa makusog nga suntok ngadto sa iyang tiyan ni Gervonta Davis niadto lamang Abril 22. Nakamantsa kini sa kanhi perpekto niyang 22-0 record uban ang 19KOs.
Dunay kusog apan limitado ang abilidad, ang 25-anyos si Garcia dunay baga kaayong sumusunod sa socia media. Sa Instagram, aduna siya'y 10.4 million followers.
Sa iyang bahin, ang 44-anyos nga si Pacquiao wala na maka-away sa propesyonal nga bantawan sukad gipilde ni Yordenis Ugas niadtong 2021.
Katapusan siyang mikatkat sa ring alang sa usa ka exhibition bout batok sa Koreanong YouTuber nga si DK Yoo, nga iyang gidominar niadtong Disyembre sa miaging tuig.
Dili hinoon kini ang unang higayon nga gitupo silang Pacquiao ug Garcia. Duna nay nahitabong negosasyon aron unta sila magsangka duha ka tuig na ang milabay apan wala kini mapinalisar.
- Latest
