Melo hingpit nang nanamilit sa basketball

CEBU, Philippines — Ang 10-time NBA All-Star nga si Carmelo Anthony pormal nga mipahibawo sa iyang pagretiro gikan sa basketball kagahapong adlawa. Pinaagi sa iyang Instagram account, gikompirma sa 38-anyos nga si Anthony nga iya nang gisirad-an ang kurtina sa mabulokon niyang karera nga milanat og duha ka dekada.

"I remember the days when I had nothing, just a ball on the court and a dream with something more," buhagay pa ni Anthony. "But basketball was my outlet. My purpose was strong. My communities, the cities I represented with pride and the fans that supported me along the way."

"I am forever grateful for those people and places because they made me, Carmelo Anthony," dugang pa ni Melo. "But now the time has come for me to say goodbye: to the court where I made my name, to the game that gave me purpose and pride."

Si Anthony, ang No.3 overall pick sa 2003 NBA draft, nagbilin og marka isip usa sa labing hait ug eksplosibong players sa kasaysayan sa basketball.

Sa 20 ka tuig niyang salida sa NBA, mipupo siya og 28,289 puntos, 7,808 rebounds ug 3,422 assists.

Gilusad ni Melo ang iyang karera uban sa Denver Nuggets sa wala pa siya mobalhin sa New York Knicks niadtong 2010. Human sa pito ka tuig niya sa New York, napakita sab siya og aksiyon uban sa Houston Rockets, Portland Trail Blazers ug LA Lakers.

Isip sakop sa Team USA, si Melo nakadaog og tulo ka sagunson nga gold medals sa Olympics niadtong 2008, 2012 ug 2016.