1st Mayor Edward Francis Salimbangon Fishing and 4x4 Tournament malampuson

CEBU, Philippines - Malampuson ang labing unang gipahigayong 1st Mayor Edward Francis Salimbangon 4x4 Challenge ug ang 1st Mayor Edward Francis Salimbangon Jigging Tournament sa nakalabay nga semana nga giisip nga labing unang nahitabo diha sa lungsod sa Tabogon sa amihanang bahin sa Sugbu.

Ang maong duha ka matang sa torneyo nakapalingaw sa mga residente sa maong lungsod nga gikalipay sab sa amahan sa lungsod nga si Mayor Edward Francis Salimbangon ilabi na nga labing una pa kini nahitabo diha sa ilang lugar ug daghan sa iyang mga konstituwente ang nalipay niini.  Si Salimbangon sa opening speech sa 4x4 Challenge nga anha gihimo sa Barangay Pio, mipadayag sa iyang kalipay tungod kay ang mga sama niini nga kalihokan makapaila og maayo sa ilang lungsod.

Makatabang kini sa pag-promote sa turismo sa ilang lungsod ug ingon man sa ilang lokal nga patigayon tungod kay dili lang mga partisipante ang nangabot kondili hasta ilang mga supporters ug pamilya nanguyog sa maong duh aka adlaw nga kalihokan.

Ang maong mga torneyo gi-organisar pinaagi sa Reels and Events sa Jigging Tournament ug sa Berol Lubricant Philippines alang sa 4x4 Challenge. Ang duha ka adlaw nga kompetisyon sa 4x4 Challenge adunay duha ka kategoriya, ang stock/modified ug ang expert level category.  Mas lisod ang taakon ang track sa expert category, apan ang mga competitor sa parehong kategoriya makadaog lang kun kinsa kadtong pinakaubos og oras uban sa mga penalties.

Sa stock modified category, midominar ang mga Sugbuanong gikan sa Carmen Offroader pinaagi sa Kampeyon nga si Jhed Abarquez ; 1st ug 2nd Placers  Judy Capuno ug Ian Capuno gikan gihapon sa maong team.

Samtang sa extreme (expert) category, nalangkat ni Joseph Julius Tan sa  O. L. O. X.  Leyte ang Championship trophy; sa 1st Place si Jeff Francis Lim sa Team C. O. A. P; samtang ang 2nd Place mao si  Rejiv Villamor sa Carmen Offroader.

Sa Jigging Tournament gisugdan kini alas 4 pa sa kaadlawon niadtong Domingo Mayo 14, 2023 nga nanukad sa Tabogon Port nga gisalmutan og sobra 100 ka mga anglers, bagito man o mga karaan ng nahilig niini. Apil sab sa torneyo ang mga lokal nga mananagat nga nagdala sa ilang mga pumpboats nga gisakyan sa mga competitor.

Ang tumong nganong gipaapil ang mga lokal nga mananagat kini aron matabangan nila ang anglers pagpangita ang mga fishing spots sa ilang lungsod, kadtong boatman nga masakyan sa mga mananaog apil sa pasidunggan ug dunay premyo.  Sa pagtak-op sa torneyo alas 4 sa hapon, si angler Dennis Tulod maoy milangkat sa championship pinaagi sa iyang 6.20kg Diamond Trevally;  1st Runner-up John Edrick Tan  sa iyang 4.60kg Pacific Pomfret; 2nd Runner-up si Charles Bas  sa iyang 2.90 kg Barracuda.

Ang ilang mga boatman nga nasakpan nakadawat sab og samang pasidungog og cash nga premyo  aron pag-ila sa ilang paningkamot pagtabang sa mga bisitang kompetitor.

Ang mga nakadaog sa Boatman Category mao silang Alvin Aroa nga gideklarar nga kampeyon tungod sa pagtabang kang Tulod; 1st Runner-up Junrey Brigola; 2nd Runner-up nga si Roldan Brigola.

Samtang duna say gihatag nga special awards niadtong kinadaghanan og kuha nga mao si Marven Boyles tungod sa nakuha niyang Barracuda (Rompi), Grouper (Pugapo) ug Ruby Snapper (Sagisi); Jay-R Bañez sa Longest Fish  pinaagi sa iyang Conger Eel (Ubod-Bat); Toothy Fish Award kang Rocky Duterte nga nakakuha og Barracuda (Rompi) ; Rare Catch Albino Noynay Jr. sa iyang Giant Squid (Dalumpapa);  Catch and Release kang Ryan Lobitaña  human nakakuha og gibuhian ang endangered nga Thresher Shark (Ihong Lawihan). Si Salimbangon nagkanayon nga tungod sa kalamposan sa maong mga torneyo, buot niyang himuon kini dili lang makausa sa usa ka tuig, ang tumong sa mayor mao ang pagpaila sa Tabogon nga usa sa nindot nga tourism destination sa probinsya sa Sugbu.