UV Lancers 2-0 na
CEBU, Philippines — Ang University of the Visayas (UV) Green Lancers mipaksit sa Cebu Institute of Technology-University (CIT-U) Wildcats, 68-63, sa 1st Mayor Inocentes Cabaron Inter-Collegiate Basketball Invitational Tournament niadtong Domingo, Abril 16, didto sa Moalboal municipal gym.
Si Froiland Maglasang mikadlit og 21 puntos samtang si Ivo Salarda mihipos og 17 puntos alang sa Lancers nga nagsolo na karon sa liderato uban ang 2-0 nga baraha.
Ang Lancers nabiyaan og tres puntos, 17-20, human sa unang kuwarter, apan sila si Maglasang ug Salarda milusad og madasigong resbak aron pagpa-abante sa Lancers og siyete puntos sa halftime, 38-31. Padayon silang nanginit aron tabangan ang Lancers pag-inat sa ilang labaw ngadto sa 57-47 ug wala na sila molingi pa og balik sukad niadto.
Sila si John Jabonete, Lawrence Mangubat, ug Jim Taala nagkumbinar og 39 puntos apan nakawang ang ilang paningkamot gumikan kay ang Wildcats natagak sa 1-1.
Sa laing duwa, ang University of Southern Philippines Foundation (USPF) Panthers mipiog sa University of San Jose-Recoletos (USJ-R) Jaguars, 74-66. Sila si Christian Alilin, Andre Cuizon ug Neon Chavez nagkumboya'g 18 puntos aron ituboy ang Panthers ngadto sa 37-31 nga labaw human sa first half.
Luyo sa paningkamot nilang Klein Cordillo ug Elmer Echavez, ang Jaguars nakasikit ngadto sa usa na lang ka lugas, 52-53, apan ang Panthers mitak-op sa duwa pinaagi sa 21-14 rally aron paglista sa una nilang daog ning torneyo nga modalit og P200,000 sa makampiyon.
- Latest
