Sirius Star Pilipinas milampaso sa CSAS ballers

CEBU, Philippines — Ang Sirius Star Pilipinas basketball team ni Cebuano coach Albert Alocillo miduwa og duha ka tune-up games batok a CSAS ballers aron pagpabilin sa maayong kondisyon alang sa nagpadayon nilang ikaunom nga Philippine Tour didto sa House sa may dalan A.S. Fortuna sa dakbayan sa Mandaue City ning bag-ohay pa lamang.

Unang misalida ang Sirius Star Wonders nga midemolis sa CSAS Crew 26-above, 114-96.

Sa ikaduhang duwa, ang Sirius Star Marvels milampornas sa CSAS Liloan U25, 100-78.

Naglabaw pa unta ang CSAS Liloan U25 og 12 puntos human sa unang kuwarter luyo sa pagpanginit ni CIT-U Juniors All-Star MVP Lawrence Mangubat.

Apan ang Sirius Star mipaulan og 3-pointers sa ikaduhang kuwarter ubos sa papangu sa sharpshooter nga si Stephon Patrick gikan sa Brooklyn, New York aron balihon ang dagan sa duwa pabor kanila sa halftime.

Padayong nagmangtas ang Sirius Star sa nahibiling bahin sa aksiyon aron pagposte og 22 puntos nga demolisyon.

Ang Sirius Star ania karon sa nasud alang sa serye sa mga exhibition matches sa nagkadaiyang dapit sa Visayas ug Mindanao, apil na niini batok sa dekalibreng Northball squad karong Anril 22 ug 23 didto sa Carmen ug Mandaue.

Gipangulohan ni Ball-Up Sporting founder ug team captain Anthony Winningham, ang ubang mga sakop sa Sirius Star mao sila si Pape Gueye (Senegal), Nicholas Sambour (Williamston, New Jersey), Terrance Cosby (Miami, Florida), Harrison Rieger (Moorsetown, New Jersey), Jordan Spencer (Kansas City, Missouri), Hastem Alawad (Los Angeles, California), Leondre Townsen (Chicago, Illinois), Ugo Kamalu (Chicago, Illinois), Dyreke Johnson (Boston, Massachusetts), Paris Sterling Collins (San Antonio, Texas), Anthony Harper (Chicago, Illinois), Rich Managor (Nigeria), Jerry Long III (Kansas City, Missouri),Todd Spotswood Jr. (Schenectady, New York), Jarell Cowell (Coram, New York), Dan Ricard (Baton Rouge, Louisiana), Joshua Willis (Chicago, Illinois), Dahsan King (Manchester, Connecticut), Dajuan Allen (Dayton, Ohio), ug Justin Norman (Sacramento, California).